Сандал сааһы көрсө сэргэхсийии, кэрэҕэ, үтүөҕэ дьулуһуу айылҕаҕа даҕаны, дьоҥҥо даҕаны биллэр. Улууспут общественнай олоҕор эмиэ сэргэхсийии тыына илгийэр.
Бу күннэргэ улууспутугар Саха республикатын эстрадатыгар номнуо бэйэлэрин суолларын тэлбит, дьон-сэргэ сөбүлээн, сэҥээрэн истэр ырыаһыттара гастроллуу сылдьаллар. Бэҕэһээ Уолбут нэһилиэгэр ыаллыы сытар Уус-Дьааҥы Хаһааччыйатыттан төрүттээх саха эстрадатын артыыстара, норуот таптаан истэр ырыаһыттара, хоту дойду хоһуун уолаттара Анатолий Горохов, Сидор Рожин уонна кинилэр убайдаатар убайдара, дьиҥнээх туундара хорсун уола Инникентий Барабанскай-Ырыа Киэсэ «Тапталтан кынаттанан» диэн бэртээхэй кэнсиэри бэлэхтээн, дьон сүргэтин көтөҕөн, үөрүүнү бэлэхтээн бардылар.
Кэнсиэри көрө кэлбит дьон уруккуттан сөбүлээн истэр уонна саҥа сонун ырыалары иһиттибит, тэҥҥэ ылластыбыт, эдэрдиин-эмэнниин бары үөрүү долгунугар куустаран, үҥкүүлээн да ыллыбыт. Кэнсиэр кэмигэр Анатолий төрөөбүт күннээх нэһилиэкпит ытык киһитин Георгий Жиркову эҕэрдэлээн «Төрөөбүт күҥҥүнэн» диэн ырыатын бэлэхтээбитэ ордук үөрүүлээх буолла.
Уолбут дьоно хоту дойду уолаттарын үөрэ-көтө көрүстүбүт, салгыы айаннарыгар үтүөнү баҕара хааллыбыт.
Лариса Слепцова, Уолбут
Е.Кононва хаартыскаҕа түһэриитэ