Абый нэһилиэгэр көхтөөх, бэһиэлэй, үлэни-үөрэҕи өрө туппут, нэһилиэктэрин сайдыытыгар ис сүрэхтэриттэн ыалдьар, кыһаллар, аныгы олох сайдыылаах тэтимин сөпкө тутуһар ыччаттардаахпытынан киэн туттабыт. Дьоҕус биисинэстээх, сөбүлүүр дьарыктаах ыччат туһунан хаһыат урукку нүөмэрдэригэр сырдатан турабын. Бу сырыыга идэ ылан, төрөөбүт нэһилиэктэригэр кэлэн үлэлии сылдьар эдэр исписэлиистэр тустарынан кылгастык кэпсиим.
Биир киэн туттар дьоһуннаах уолбутунан Константин Стручкову ааттыахха сөп. Константин Абый орто оскуолатын бүтэрээт, Дьокуускайдааҕы сибээс уонна энергетика колледжыгар киирбитэ. Техник-электрик идэтин баһылаабыта. Тута Абыйга олохтоох дизельнэй станцияҕа машиниһынан үлэтин саҕалаабыта. «Станция үлэтэ үрдук эппиэтинэһи ирдиир. Үлэҕэ киириэхпиттэн баай уопуттаах «аксакал» убайдар элбэх сүбэлэрэ-амалара, такайыылара үлэбэр улаханнык туһалыыр. Талан ылбыт идэбин сөбүлүүбүн, хамнаспын мыыммаппын. Бэйэм дэриэбинэҕэ олорорбун ордоробун. Хара үлэттэн толлубаппын, үлэ араас көрүҥэр үөрүйэхпин. Иллэҥ кэммэр айылҕаҕа сылдьарбын, бултуурбун-алтыырбын, спордунан дьарыктанарбын сөбүлүүбун. Олохтоох дьаһалта ыччаты түмэр араас тэрээһиннэри, субуотунньуктары, күрэхтэри ыытар. Эдэр исписэлиистэргэ уопсай дьиэ тутуллара буоллар», — диэн Константин дьоһуннаах санаатын үллэстэр.
Сахая Слепцова Намнааҕы педагогическай колледжы бүтэрэн, Дьооску учаастагар бэйэтэ сылдьыбыт уһуйааныгар иитээччинэн үлэлиир. «Эдэр үлэһиккэ коллектив өттүттэн көмө, өйөбүл баар, ыйан-кэрдэн биэрэллэр, биир тыл булан үлэлии-хамсыы сылдьабын. — диэн Сахая Ивановна кэпсээнин саҕалыыр. — Хамнаһым бэйэбэр тиийэр. Эдэр киһиэхэ дэриэбинэҕэ олорор туох да куһаҕана суох. Арай сибээс өҥөтө өссө тупсара, түргэтиирэ буоллар, олох-дьаһах, үлэ-хамнас да тупсуо этэ. Дьонум туспа хаһаайыстыбалаах буолан, иллэҥ кэммэр дьоммор күүс-көмө буолабын. Улууспутугар эдэр киһи сайдарыгар араас күрэхтэр, семинардар ыытыллаллар. Ыччат өссө көхтөөх буоларыгар ыччат форумнарын, күрэхтэһиилэри сылы быһа тиһигин быспакка ыыталлара буоллар, ыччат сайдыа, төрөөбүт, улааппыт дойдутун өссө таптыа этэ».
Лина Стручкова М.К. Аммосов аатынан ХИФУ педагогическай үнүстүүтүн бүтэрбитэ. Идэтинэн иитээччи. Билигин олохтоох дьаһалтаҕа сүрүн исписэлииһинэн үлэлиир. «Эдэр үлэһит хайдах кэллэктиипкэ үлэтин саҕалыыра улахан оруолу ылар. Кэллэктиибим олус үчүгэйдик көрсөн, саҥа саҕалаан эрэр үлэбэр көмөлөһөн, өйөбүл баарын тута билбитим. Абыйга төрөөбүт, улааппыт буолан, дэриэбинэ олоҕор туох да итэҕэс баарын көрбөппүн. Хата, төттөрү дэриэбинэ салгынныын ыраас, дьон-сэргэ элэккэй. Сир астаан, оҕуруот бэрийэн, сайын да бүтэн эрэрин өйдөөбөккө хааллым. Оҕолорум кыра буоланнар, иллэҥ кэммин оҕолорбор аныыбын».
Эдэр дьону кытта кэпсэтэрбэр хас биирдиилэриттэн дойдутун патриота диэн ханнык хаачыстыбалардаах киһи буолуохтааҕый диэн ыйыттым. Бары биир киһи курдук «Патриот диэн дойдутун таптыыр, бэриниилээх, дойдутун туһугар кыһаллар, кини сайдарын туһугар үлэлиир-хамсыыр киһи» диэн эппиэттээтилэр. Бу тылга эрэ буолбатаҕыттан, кинилэр бэйэлэрин холобурдарынан чахчы дойдуларын таптыылларын көрдөрөллөрүттэн долгуйа үөрдүм.
Бу курдук, Абый ыччаттара төрөөбүт дойдуларыгар кэлэн, үлэлии-хамсыы, олохсуйа хаалаллар. Ыччаттарбытыгар үлэлэригэр, олохторугар ситиһиилэри баҕарабыт. Нэһилиэктэрэ сайдарыгар бары сыраларын ууран туран үлэлиэхтэрэ диэн эрэнэбит. Ханнык баҕарар нэһилиэк кэскиллээх ыччаттардаах буоллаҕына сайдыы тэтимигэр киирэрэ саарбаҕа суох.
Анна ЧИРКОВА, Абый с.