«Тапталлаах Уолбутум» диэн фотоальбом-кинигэ сүрэхтэниитэ ахсынньы 6 күнүгэр Белай Гора Киин библиотекатын ааҕар саалыгар буолан ааста.
Бу 200 страницалаах халыҥ фолиант кинигэни Егор Жирков, Вероника Горохова уонна Елизавета Кононова иилээн-саҕалаан, урукку-билиҥҥи баһылыктар көмөлөрүнэн, Дьокуускайга оҥотторон таһаардылар. Кинигэ Уолбут нэһилиэгин 90 сылыгар анаммыта кэрэхсэбиллээх. Маны оҥорорго нэһилиэк дьоно бары кэриэтэ хабылланнар, сүүнэ үлэ балтараа сыл устата ыытыллыбыт.
Автордартан биирдэстэрэ — Егор Жирков бу кинигэ хаартыскаларын, дааннайдарын 1995 сылтан хомуйбутун кэпсээтэ, дьон-сэргэ ууһун-төрдүн билэринэн сөхтөрдө. Лиистэри арыйталаан истэххэ, бииртэн биир былыргы-билиҥҥи сыллар, араас сэдэх хаартыскаларга тыктарыллан, ааспыт олох сибидиэтэлистибэтин быһыытынан арыллан истилэр. Мустубут дьон олус иһирэх тылларынан эргэ Уолбут туһунан, билиҥҥи Киэн-Күөл үлэһитэрин, олохтоохторун хаартыскаларын буланнар күө-дьаа кэпсэтиин таһаардылар. Улуус культуратын салаатын салайааччыта Айталина Унарова уонна Киин библиотека коллектива фолианы оҥорбут дьоҥҥо махтанан туран Анал суруктары, сэмэй бэлэхтэри туттартаатылар. Вероника Горохова бу улахан үлэ күн сирин көрөрүгэр Уолбут нэһилиэгин баһылыга Эдуард Сергеев улахан өҥөлөөҕүн, үбү-харчыны тыыран, аттаран олус сиэдэрэй оҥоһуулаах кинигэ тахсыбытыгар үлэлэспитин бэлиэтээтэ уонна аны текстээх кинигэ тахсарыгар үлэлэһэ сылдьалларын, номнуо үбүн торумнаабыттарын биллэрдэ.
Ити курдук, Абый улууһун өссө биир нэһилиэгэ бэйэтин историятын, олоҕун-дьаһаҕын, дьонун-сэргэтин кэпсиир кинигэни таһаарбытыта олус кэрэхсэбиллээх, биһирэнэр, өссө да ити хамсааһын салҕанан, аны, атын кинигэ тахсыа диэн эрэниэҕин.
Николай ПЕТРОВ.