Бүгүн Уолбуттан биһиги общественнай корреспондеммыт Вероника Горохова ыыппыт матырыйаалыттан бу үлэһит туһунан ааҕаргытыгар ыҥырабыт.
«Хотугу кыым» редакциятын көрдөһүүтүэн Владимир Слепцов көрсөн кэпсэттим. Кини Уолбут нэһилиэгин төрүт олохтооҕо. «Үлэлииргэ чэпчэкитэ суох социальнай эйгэҕэ, дьон күннээҕи кыһалҕатын аччатар-кыччатар туһугар үлэлээбитим-хамсаабытым 2001 сылтан үс сыл буолла», — диир Владимир Евгеньевич. Кырдьык ити тыллар олохтоохтор, сөпкө этилиннилэр. Владимир манна нэһилиэнньэ, ытык кырдьаҕастар харахтарын далыгар улааппыт буолан, түөлбэтин дьонун-сэргэтин олус убаастыыр, барыларын билэр. «Кинилэр миэхэ бэйэ дьоно, амарах, сырдык дууһалаахтар. Киһи кэллэҕинэ, мэлдьи үөрэ-көтө көрсөллөр», — диэн мичээрдии-мичээрдии кэпсээнин саҕалыыр. Биллэн турар, итинник хардарыта сылаас сыһыан үлэни чэпчэтэрэ биллэр. Соҕотох олорор дьоҥҥо, кырдьаҕастарга кэпсэтии-ипсэтии саамай наадалааҕын Владимир Евгеньевич тоһоҕолоон бэлиэтиир. «Тустаах киһин наадыйар үлэтин толорон, түмүктээн баран, атах тэпсэн олорон, сэһэргэстэххэ, сэргэхсийэ, сирэйдиин-харахтыын сырдыы түһэллэрэ наһаа бэрт буолааччы», — дии-дии кумааҕытын бэрийэр.
Кини көрөр-истэр тоҕус киһилээх эбит. Ол — инбэлиит, соҕотох кырдьаҕас, элбэх оҕолордоох дьон. Кинилэри күннэтэ кэриэтэ кэрийэн, туохха наадыйалларын туоһулаһан, кинилэр кыайбат, дьиэ ис-тас үлэтин толорор, ол курдук астарын, эмтэрин да атыылаһан аҕалар, кыһын хаар күрдьэр, мас мастыыр, атын хаһаайыстыбаннай үлэлэри эмиэ толорор, хаадьайбыт, хамсаабыт малы-салы өрөмүөннүүр.
Эр киһи буолан бараҥҥын сүрдээҕин дьону кытта үлэлэһэҕин диэбиккэ, Владимир Евгеньевич: «Икки сыллааҕыта «Арктика» диэн рабочай идэни үөрэтэр профессиональнай тэрилтэҕэ үөрэнэн үһүс разрядтаах социальнай үлэһит идэтин ылбытым. Үлэбин сөбүлүүбүн. Дьоҥҥо үчүгэйи оҥорорун, көмөлөһөрүҥ, кинилэр махталларын ыларын олус үчүгэй, кимиэхэ эрэ наадалаах, туһалаах эбиппин, бу сиргэ мээнэ олорбот эбиппин диэн санаа үөскүүр», — диэн идэтинэн киэн тутта эппиэттээтэ.
Владимир Евгеньевич чөл олоҕу тутуһар, иллэҥ кэмигэр балыктыырын уонна бултуурун олус сөбүлүүр. Нэһилиэк общественнай олоҕор, спортивнай тэрээһиннэргэ көхтөөхтүк кыттар. Кэргэнин кытта түөрт оҕону иитэллэр.
Ити курдук, улууска кыаммат араҥа дьону кытта быһаччы үлэлиир соҕотох эр киһи социальщик туһунан кылгастык кэпсээтим.
Вероника ГОРОХОВА.