Социальнай үлэһиттэр уйуммат, кыаммат, дьиэттэн тахсыбат дьоннорго сылдьан, көмө-тирэх, илии-атах буолалларын кимнээҕэр да инбэлиит, аар кырдьаҕас, сытар ыарыһах дьон олус бэркэ билэллэр. Кинилэр үлэлэрин быйылгыттан дьиэҕэ социальнай көмөнү оҥорор салаа специалиһа Мотрена Бережнова иилиир-саҕалыыр.
Улуус үрдүнэн бу салааҕа барыта 11 социальнай үлэһит, 4 участковай уонна экспертэр баалларыттан, Белай Гораҕа алта, нэһилиэктэргэ биэс соцүлэһиттээхпит. Кинилэр көрөр-харайар дьоннорун ахсаана 119 киһи — элбэх сыыппара. Дьэ, ити этиллибит пенсиялаахтарга, үлэлээбэт дьоҥҥо туруктарыттан көрөн, сороххо күн аайы, атыттарга нэдиэлэҕэ биирдэ сылдьаннар, күннээҕи олохторугар баар кыһалҕалары быһаара, эми-тому, аһы атыылаһан аҕалаллар, дьиэни, түннүгү сууйаллар, бэрэбээскини баайаллар, хаан баттааһынын мээрэйдииллэр, система туруораллар, ыксаатахтарына суһал көмөнү ыҥыраллар.
Социальнай үлэһиттэр итинэн эрэ мүҥүрдамматтар — сэрэдэ аайы араас куруһуоктары үлэлэтэллэр, дьон тэһийэрин туһугар дьаһаллары ыыталлар. Ол курдук, СВО-ҕа анаан сиэккэни таҥыы, буойуннарга үтүлүк тигиитэ, наскыны баайыы, теннискэ оонньотуу, үҥкүүгэ үөрэтии кинилэр санныларыгар сүктэриллэр. Бу куруһуоктарга хаамар дьон социальнай управление дьиэтигэр кэлэн дьарыктаналлар.
Куһаҕана диэн, урут колясканы, торуоскалары эҥин босхо биэрэр буоллахтарына, сотору кэминэн чөлгө түһэрэр малларын аны эттэһэн туттар буолуохтара үһү. Ол харчытынан реабилитациялыыр саҥа тэриллэри атыылаһаллар диэн буолбут.
Үлэһиттэр чааһынай секторынан, аэрэпордунан, нефтебазанан, бөһүөлэк бары уулуссаларынан кыһынары-сайыннары сылдьан, дьоннорун абырыыллар. Ол сырыыларыгар араас моһол, мүччүргэн баарын бэйэлэрэ эрэ билэн эрдэхтэрэ. Дьоруой дьон диэн кинилэри аатттыахха сөп. Араас уопсай дьаһалларга оҕонньоттору, баабыскалары тиэйэргэ, хата, анал массыыналаах буолан эрийсэллэр, онно эппиэтинэстээх, ис сүрэҕиттэн ылсар суоппардара Анатолий Литвинов баар диэн хайгыылар. Бэтэрээннэртэн ДИПИ саҕаттан үлэлиир Анна Суздалова сүбэтэ-амта үгүс, эдэрдэри такайан, бэйэтин холобурунан үтүө үгэстэри тутуһалларыгар үөрэтэр. Ол да иһин, итинник наставниктар баар буоланнар, социальщиктар кыаммат дьоммут дьиэҕэ хааттарбатынар, бэйэ-бэйэлэрин кытта алтыһан үөрэ-көтө сырыттынар диэн кыһанан үлэлииллэр буоллаҕа…
Николай ПЕТРОВ.