Депутат быыбардааччыларын кыһалҕаларын иһиттэ

Бу күннэргэ улуус иһигэр көтөр аалынан сырыы  суоҕуттан Василиса, Николай Ефимовтар 80 саастаах төрөппүттэрин кытта алларанан хайдах курдук эрэйдэнэн Абыйтан улуус киинигэр Белай Гораҕа айаннаабыттарын видеоҕа устан интернет ситимигэр таһаарбыттара киэҥник тарҕанна. Видеону Халыма-Индигир уокуругуттан талыллыбыт депутаппыт Сахамин Афанасьев (РФ сенатора) үлэтинэн Москваҕа сылдьан көрбүт уонна кинилэргэ төлөпүөнүнэн сибээскэ тахсыбыт.

Биир дойдулаахпыт Николай Ефимов кэпсиир:

—  Москваҕа үлэтинэн сылдьан  көрөн, миэхэ телефоннаата. Тута сарсын Дьокуускайга көтөн тиийэбин  диэтэ уонна личнэй приемҥа ыҥырда.

«Маннык айаннаан кэллигит дуо? Төрөппүттэргит хайдах итинник айаны тулуйан кэллилэр?» —  диэн улаханнык соһуйда, салынна. Кини төрөппүттэрэ эмиэ биһиги дьоммут саастыылаахтара.

Кэлиҥҥи уонча сылтан баар проблеманы кэпсээтибит. Сайыҥҥы — күһүҥҥү бириэмэҕэ самолет улууска базаланара, чопчу расписаниелаах көтөрө наадатын туруорустубут, субсидияламмыт авиабилиэт тыа дьонугар тиксэрэ буоллар диэн баҕа санаабытын эттибит. Сахамин Афанасьевич биһиги этиилэрбитин болҕойон иһиттэ, сурунна. Бу проблема Абый эрэ нэһилиэгэр турбатын, улуус бары нэһилиэктэрин кыһалҕата буоларын бэлиэтээтибит.

Онон туох эмэ хамсааһын буолуо диэн эрэнэ күүтэбит. Депутаппыт солото суох үлэтиттэн быыс булан, ыҥыран көрсөн проблеманы истибитэ санаабытын көтөхтө».

Норуот депутата дьон кыһалҕатыгар чугастык ылыммытын, боппуруос быһаарылларыгар кыым сахпытын бэлиэтээн туран, норуот туһугар үлэтигэр ситиһиини баҕарыахха.

Сусанна Никитина.