Россияҕа Дьиэ кэргэн, Саха сиригэр Оҕо саас сылларын чэрчитинэн оройуоннааҕы тыа хаһаайыстыбатын бородууксуйатын атыылыыр үгэскэ кубулуйбут «Арктика бэлэҕэ-2024» быыстапка-дьаарбаҥка буолан ааста.
Дьаарбаҥканы олохтоохтор сылын аайы долгуйа күүтэллэр, бу күн кулууп дьиэтигэр саҥа сылы баай-талым сандалылаах көрсөрго дьон бөҕө тоҕуоруһа мустубут. Кииҥҥэ киирии-тахсыы, атыы-кутуу элбээбит .
Ураһалаах агрооскуолатын үөрэнээччилэрэ кэлбит дьону тоҥ балык кыһан, миэстэтигэр алаадьылаан, итии үүттээх чэйинэн күндүлээбиттэрэ сонун көстүү буолла.
Тыа хаһаайыстыбатын бородууксуйатын оҥорон таһаарааччылар быыстапкаларын түмүгүнэн бастыҥнар ааттаннылар.
«Атыы-тутуу лидерэ» диэн анал ааты фермер Иван Слепцов уонна Абый агрооскуолата, «Саамай элбэх ас-үөл арааһа» номинацияҕа Муҥурдаах кыайда, «Чулуу астаах остуол» ааты Майыар нэһилиэгэ ылла, «Саамай оҥорумтуолаах агрооскуола» аат Ураһалаахтарга ананна. Маны таһынан быыстапкаҕа актыыбынай кыттыыны ылбыттарын иһин Туоһу суруктар Уолбут нэһилиэгэр уонна Бальчиновтар дьиэ кэргэттэригэр туттарылынна.
Тыа хаһаайыстыбатынан дьарыктанааччылар эти, үүт, балык бородууксуйатын, кулинарнай оҥоһуктары уо.д.а. атыылаатылар. Убаһа этин сыаната ортотунан 750-800 солк., хаан – 300-1500 солк., борооску быара – 3000 солк., ынах иһэ – 500-800 солк., хатта – 600 солк., арыы – (500) – 700 солк., куобах – 1500 солк., тоҥ үүт – 150-195 солк., кыһыл отон, сиискэ, клюква, кыһыл хаптаҕас (1 кг) — 350-500 солк., моруоска отон (500 гр) – 500 солк., тоҥ күөрчэх (1 пакет) – 1200-1500 солк., пельмен – 700-800 солк., суорат (1 кг) – 500 солк, мыраҕатта (1 кг) – 300 солк., балык фарша — 400 солк., ыыһаммыт чыыр (1кг) – 1200 солк., «Индигирка» салаат – 500 солк. атыыланна.
Оройуоннааҕы тыа хаһаайыстыбатын бородууксуйатын атыылыыр үгэскэ кубулуйбут «Арктика бэлэҕэ-2024» быыстапка-дьаарбаҥка кэмигэр #Своихнебросаем акция тэрилиннэ.
Александра Заровняева