От ыйын 25 күнэ… Ураһалаах нэһилиэгэр ыарахан күн… Олус хомолтолоохтук, саҥа олоҕу олорон эрэр эдэр оҕобутун, Анал байыаннай дьайыы кыттыылааҕын, младшай сержант Бережнов Артур Семеновиһы тиһэх суолугар атаарыы …
Артур 2022 с. балаҕан ыйын 26 күнүгэр, барыбытын атыйахтыы аймаабыт Анал байыаннай дьайыы бастакы хомууругар бэбиэскэ тутан, Ийэ дойдутун көҥүлүн көмүскүү аттаммыта. Айаннаабыта кини холкутук, аймаммакка, дьиҥнээх эр киһи, патриот быһыытын, үтүө майгытын көрдөрөн… Артур бу дьыл бэс ыйын 30 күнүгэр Ийэ дойдутун чиэстээхтик көмүскүү сылдьан суорума суолламмыта.
Абый улууһун хорсун буойунун Артур Бережнову тиһэх суолугар атаарар күҥҥэ Ураһалаах нэһилиэгин, Белай Гора бөһүөлэгин олохтоохторо Бойобуой уонна Үлэ албан аат болуоссатыгар муһуннулар. Бу күн улуус баһылыга Владимир Новиков, Ураһалаах орто оскуолатын директора Изольда Стручкова, быстах хомуурга ыҥырыллыбыттарга уонна кинилэр дьиэ кэргэттэригэр көмөнү оҥорор ыстаап чилиэнэ Екатерина Соломова Артур хорсун санаалаах, төрөөбүт дойдутун патриота буоларын бэлиэтээн, тыл эттилэр. Дойдубут хаарыаннаах уола үтүөкэн майгылаах, аҕыйах саҥалаах, үлэҕэ-хамнаска сыстаҕас, олус эппиэтинэстээх киһи этэ.
Арыалдьыттаан кэлбит буойун Российскай Федерация былааҕын Артур Семенович Бережнов ийэтигэр туттарда.
Артур 2000 с. ахсынньы 26 күнүгэр Айталина Дмитриевна, Семен Николаевич Бережновтар дьиэ кэргэннэригэр бастакы уол оҕонон күн сирин көрбүтэ. 2007 с. Ураһалаах орто оскуолатыгар үөрэнэ киирбитэ уонна 2018 с. бүтэрбитэ. Оскуолаҕа үөрэнэр сылларыгар физика, трактороведение уонна технология уруоктарын ордук сөбүлүүрэ. Оскуола кэнниттэн суоппар идэтин баһылаан, төрөөбүт дойдутугар кэлэн үлэлээбитэ. 2021 с. ыам ыйын 22 күнүгэр Россия армиятыгар ыҥырыллан, дойдутун иннигэр ытык иэһин толорон кэлбитэ уонна «Дороги Арктики» тэрилтэҕэ үлэлии киирбитэ.
Айталина Дмитриевна күндү уола, бииргэ төрөөбүттэр убайдара, Артур доҕотторун эрэллээх табаарыстара — көнө-үтүө майгылаах убаастанар киһибит — Артур, Артусик күн сиригэр олорбут олоҕун дьоһуннук түмүктээтэ… Кини туһунан уостан түспэт үтүө тыллар үйэлэртэн үйэлэргэ, көлүөнэттэн көлүөнэҕэ сырдык өйдөбүл буолан кэпсэниэхтэрэ.
Умнуллубат өйдөбүл уонна Албан Аат буоллун хорсун уолбутугар!
Александра ЗАРОВНЯЕВА.