Абый улууһугар баһаартан ыксаллаах быһыы-майгы эрэсиимэ биллэриллибитэ. Билигин улууска 117 киһи баһаары умуруорууга үлэлиир. Ардах суох буолан уонна куйаас күн-дьыл туран, балаһыанньа кытаатта. Маныаха республика, олохтоох нэһилиэнньэ туһааннаах көмөнү оҥоро олороллор.
«Дороги Арктики» машинистара Александр Соломов уонна Александр Стручков сирдэрин-дойдуларын туһугар түүннэри-күнүстэри дьуһуурустубанан Шантуй SD16 тыраахтарынан кэтит хоруу анньа сылдьаллар.
«Коллегабынаан сарсыарда 9 чаастан киэһэ тоҕуска диэри солбуйса сылдьан үлэлиибит. Бу иннинэ туруоруллубут дьаһалы толорбуппут. Бэҕэһээҥҥиттэн Белай Гора сыбаалкатыттан аэропорт протокатыгар диэри тыраахтарынан кэтит хоруу анньа сылдьабыт. Быһа холоон 4-5 км курдук уһуннаах”, — диэн Александр Стручков кэпсиир.
Ыччат төрөөбүт дойдутугар бэриниилээх, кыһалҕа тирээтэҕинэ көмөлөһөргө бэлэмнэриттэн киһи үөрэр.
Александра ЗАРОВНЯЕВА.