Бэс ыйын 26 — от ыйын 7 күннэригэр Дьокуускайга ыытыллар «Азия оҕолоро» норуоттар икки ардыларынааҕы ахсыс оонньуулар аһыллыыларыгар 4000 кэриҥэ киһи, ол иһигэр 1,8 тыһыынча оҕо кыттара күүтүллэр.
Абый улууһуттан оонньуулар култуурунай бырагыраамаларыгар «Абыйчаана» образцовай ансаамбыла кыттыыны ылыа. Бу туһунан салайааччы Сардаана Корякина кэпсиир:
— Ааспыт сыл балаҕан ыйыгар уонна алтынньыга улуустарга үлэ кэллэктииптэригэр култуурунай тэрээһиҥҥэ кыттыыга анаан сүүмэрдээһин ыытыллыбыта. Үҥкүүһүттэр үгүс ирдэбили ааһаннар, «Азия оҕолоро» норуоттар икки ардыларынааҕы ахсыс оонньууларга бэһис төгүлүн кыттар чиэскэ тигистилэр. Бу иннинэ 2004, 2008, 2012, уонна 2016 сылларга Дьокуускайга ыытыллыбыт тэрээһиннэргэ ансаамбыл Абыйын аатын ааттаппыта.
15 оҕо састааптаах «Абыйчаана» бөлөх өрөгөйдөөх тэрээһин үөрүүлээх аһыллыытыгар «Оһуор» ХР-үҥкүүгэ кыттыыны ылыаҕа. «Олени-корсен» хартыынаҕа 200-чэ Арктика оҕолоро үҥкүүлүөхтэрэ. Түмүккэ дэйбиирдээх «Дьөһөгөй» үҥкүүтүгэр кыттыахтара. Маны таһынан, площадкаларынан култуурунай тэрээһиннэриннэргэ анаан икки нүөмэри бэлэмнээн, илдьэ баран эрэбит. Төрөппүттэр оҕолорго таба тириититтэн таҥастары-саптары тиктилэр, киис кутуругунан, оҕуруонан киэргэттилэр.
Авиа билиэт көстүмнэ оҕолор икки бөлөҕүнэн Дьокуускайга көттүлэр. Бэс ыйын 12 күнүттэн репетициялар саҕаланаллар.
Бу күннэргэ улуус баһылыга Владимир Новиков оҕолору, салайааччылары кытта көрсөн кэпсэттэ, сылаас ис хоһоонноох эҕэрдэтин тириэртэ.
Санатан эттэххэ, дойду бэрэсидьиэнэ Владимир Путин Саха сиригэр 1996 сыллаахха төрүттэммит Оонньуулары спорт салаатыгар биир ситиһиилээх бырайыагынан ааттаан турар. Оонньуу сыала — оҕо, ыччат успуордун сайыннарыы уонна норуоттар икки ардыларынааҕы спортивнай бииргэ үлэлээһини бөҕөргөтүү. 2024 сылга бэс ыйын 25 күнүттэн от ыйын 7 күнүгэр диэри VIII төгүлүн ыытыллар спортивнай оонньууларга, успуорт 24 араас көрүҥэр илин-кэлин түсүһүөхтэрэ.
Александра ЗАРОВНЯЕВА.