Олунньу 1-2 күннэригэр хапсаҕайы сэҥээрээччилэр өр күүппүт күннэрэ буолан ааста. Ол курдук, Дьокуускайга «Өрөгөй» спорт киинигэр ыытыллыбыт хапсыһыыга 9 тас дойдуттан: Азербайджантан, Беларусьтан, Кытайтан, Кыргызстантан, Монголияттан, Грузияттан, Индияттан, Узбекистантан, Иран Исламскай Республикатыттан, Россия регионнарыттан уонна Саха сириттэн уопсайа 477 бөҕөс кыттыыны ылла.
Биһиги улууспутуттан Степан Щелканов — 57 кг, Ярослав Шестаков — 65 кг, Мирон Охлопков — 65 кг, Григорий Петров – 85 кг, бэтэрээннэргэ — Александр Новиков, 90 кг кииристилэр. Бөлөх салайааччыта Александр Новиковтыын күрэх туһунан кэпсэтэбит:
- Маҥнайгы күн 85, 95, 95 киилэттэн үөһэ, бэтэрээннэргэ 80, 90, 90 киилэттэн үөһээ ыйааһыннаахтар кииристилэр.
Урукку сылларга хапсаҕай бириэмэнэн хааччаҕа суоҕа, утарылаһааччыҥ сири таарыйыар диэри хас да чаас ыытыллара. Оттон билигин тарбахтан ураты ханан баҕарар тутуһуохха сөп, көбүөрү таарыйдыҥ да туоруугун, хапсыһыы 4 мүнүүтэ тохтобула суох ыытыллар, бэтэрээннэргэ 3 мүнүүтэ буолар эбит.
Бүгүҥҥү быраабыланан хапсаҕайдьыттар сүрүннээн «түргэн» — утарылаһааччы атаҕыттан уонна төбөтүттэн тутан охторуу, “халбарыйан тэбии” уонна “халбарыйыы” — атахха киирэн түөскүнэн көтөҕөн быраҕыы көрүҥнэрин туһаналлар.
Биһигиттэн икки киһи бастакы күн, үс киһи иккис күҥҥэ түбэстибит. Онон тус-туспа кэмнэргэ киирсии буолла.
Биһигиттэн Степан Щелканов үчүгэй киирсиини көрдөрдө, 4 эргиири ааста. Мин 5 эргиири ааһан – 5 миэстэҕэ тигистим.
Биһиги бу турнирга кыттыыбыт сүрүн сыалынан кулун тутар ыйга Петр Алексеев бирииһигэр өрөспүүбүлүкэтээҕи чемпионакка киирсэн, Манчаары оонньууларыгар путевкаҕа тиксии этэ. Хомойуох иһин, «Хаҥалас хапсаҕайыгар» Абыйдартан киирсиэхтээх дьон кыттыбатылар. Маннык күрэхтэргэ, киирсиилэргэ элбэхтэ сылдьар киһи сайдар, ситиһиилээх буолар.
Спортсменнарбытыттан киһини сэҥээрдэр, түргэн туттуулаах, ыраас хапсыһыылары кэнэҕэс да күүтэбит.
Анастасия СОРОКОУМОВА.