Абый агрооскуолатын 10 кылааһын үөрэнээччитэ Юрий Слепцов үгэс буолбут дьарыгы суолдьут оҥостубут дьиэ кэргэнин туһунан суруйар.
Сыспай сиэллээх, хороҕор муостаах — норуоппут иитиллэн кэлбит барҕа баайа, аныгы кэмҥэ иннигэр тутар киэн туттуута. Биһиэхэ, сахаларга, сүөһүнү иитии ордук улахан суолталаах төрүт дьарыкпыт буолар. То5о диэтэххэ, ынахтаах, сылгылаах буоламмыт бу уйаара-кэйээрэ биллибэт чэҥ муустаах дойдуну баһылаабыппыт, иччилээбиппит.
Дойдубут Президенэ В.В.Путин үүммүт сылы дьиэ кэргэн сылынан биллэрдэ. Бу түгэни туһанан, мин тыа хаьаайыстыбатын өрө туппут үлэһит дьиэ кэргэним туһунан кэпсиэхпин баҕарабын.
Сахаларга “Үлэ киһини киэргэтэр” диэн өс хоһооно баар. Үлэһит киһи хаһан да охтон-сүтэн биэрбэт. Кини аата үйэлэргэ сураҕырар уонна кэлэр ыччакка холобур буолар. Мин киэн туттар уонна холобур оҥостор киһим – эһэм – Стручков Василий Дмитриевич. Үлэ-тыыл бэтэрээнэ, “Үлэ албан аат” орден кавалера, сыралаах үлэтин иһин норуот хаһаайыстыбатын бүтүн Союзтааҕы быыстапкатын үрүҥ көмүс уонна боруонса мэтээллэрин, тыа хаһаайстыбатын министерствотын анал премиятын хаһаайына. Кини олоҕун тухары үлэни үрдүктүн тутан, суолдьут сулус оҥостубут киһи буолар.
Эһэм Абый тыатын хаһаайыстыбатын биир биллэр-көстөр сүрүн сылгыһыта, суобастаах үлэһитэ этэ. Кини үлэлиир сылларыгар сылгы ахсаана элбээбит, тэрилтэтэ биллэ сайдыбыт.
«Үлэһит киһи оҕото — үлэһит буолар» диэн этэллэр. Аҕа, ийэ тугу гынарын, хайдах үлэлиирин көрөн оҕо элбэххэ үөрэнэр. Мин эһэм улахан уола Стручков Юрий Васильевич олоҕун тухары биир сиртэн тэйбэккэ үлэлээбит тракторист этэ. Кини дьоҥҥо от-мас тиэйэрэ, кыһыннары, сайыннары элбэх киһини абырыыра.
Орто уола Стручков Анатолий Васильевич аҕатын туйаҕын хатаран Абый нэһилиэгин биир тутаах киһитэ. Кини билигин нэһилиэнньэни, улууһу үрүҥ аһынан, этинэн хааччыйа олорор. Саха сирин тыатын хаһаайыстыбатын үтүөлээх үлэһитэ, бэтэрээнэ, туйгуна, тыа хаһаайыстыбатын хас да төгүллээх бочуоттаах үлэһитэ.
Кыра уола Евгений эмиэ нэһилиэккэ биллэр тракторист, олоҕун тухары ыарахан үлэҕэ сылдьыбыт хорсун киһи. Киниэхэ аҕата “Эр киһи үлэни өрө тутуохтаах, үлэни эрэ батыстаҕына, муммат-тэммэт, киһи буолар”, — диэн этэрэ.
Мин дьиэ кэргэним эмиэ сылгы иитэр. Үөр сылгыбытын оҕолор кыра эрдэхпититтэн бэйэбит көрөбүт, оҕолуубут, аһатабыт-сиэтэбит. Аҕам Гавриил Пантелеймонович «Бу үйэҕэ сылгылаах-ынахтаах эрэ ыал уйгулаах олохтонуоҕа, саха буолан баран сүөһүну эһимэҥ, элбэтиҥ”,- диэн сүбэлиир.
Мин санаабар, тыа хаһаайыстыбатын үлэтэ олус ыарахан, биир да өрөбүлэ, бырааһынньыга суох үлэ. Манныгы үлэһит эрэ киһи кыайара саарбаҕа суох. Эһэм, убайдарым, аҕам бары бу хайысханы тутуспут дьон. Мин кинилэри киэн тутта кэпсиибин. Мин эмиэ үлэһит киһи буолуом. Баҕарар идэбин баһылаан дойдубар үлэлии кэлиэм, дойдум сайдарыгар элбэҕи оҥоруом.
