Уолбут нэһилиэгин олохтоохторо анал байыаннай дьайыыга сылдьар хорсун санаалаах буойуннарга араас көмөнү быыстала суох оҥороллор. Ол курдук бу сылы түмүктүүр кэккэ тэрээһиннэр ыытылла тураллар.
С.Ф.Марков аатынан Уолбут орто оскуолатыгар иитэр үлэни тэрийээччи Новгородова Александра Ивановна сэһэргээтэ:
— Сэтинньи 29 күнүгэр С. Ф. Марков аатынан Уолбут орто оскуолатыгар Анал байыаннай дьайыыга аналлаах тэрээhин буолла. Бастаан Уолбуттан төрүттээх Слепцов Ким Спиридонович сырдык кэриэhигэр уонна сэрии толоонугар охтубут чулуу уолаттарбытын санаан кутурҕан тохтобулун биллэрдибит. Ким Спиридонович туhунан сиһилии билиһиннэрдибит. Салгыы Анал байыаннай дьайыыга маңнайгы хомуурга нэhилиэктэн барбыт Слепцов Егор Аркадьевич, Бабиченко Валерий Валерьевич, Уолбут оскуолатын араас сылларга бүтэрбит Федоров Николай Сергеевич, Корякин Петр Иванович, Афанасьев Виталий Александрович, Федоров Александр Афанасьевич, Жирков Дементий Дементьевич, Ефимов Станислав Сергеевич уонна биhиги нэhилиэктэн төрүттээх Дохунаев Станислав Семенович туhунан улахан экраңңа презентация, видеоролик көрдүлэр. «Якут Шурик» позывнойдаах гвардия сержана Александр Федоров биhиги оскуолабытын бүтэрбитин, хорсун быhыытын истэн оҕолор сөхтүлэр-махтайдылар.
Ыҥырыылаах ыалдьыт – эйэлээх олох түстэнэрин туһугар, дойдутун көмүскүү сылдьар, билигин бааһыран быстах кэмҥэ дойдутугар кэлбит учууталбыт Валерий Валерьевич Бабиченко оҕолор ыйытыыларыгар толору эппиэттээн, долгутуулаах көрсүһүү буолан ааста. Оҕолор төрөөбүт дойдубутун таптыахтаахпыт, дойдубутун көмүскүү сылдьар хорсун-хоодуот саллааттарбытыгар махталлаах буолуохтаахпыт, ийэ дойдубутун көмүскүүр хас биирдиибит иэһэ диэн өйдөөтүлэр диэн бүк эрэллээхпин.
Нэһилиэкпит олохтоохторо иллээх олох туһугар көмөҕө биир сомоҕо буолан кытталлар. Ол курдук, нэһилиэк эр дьоно собо, сордоҥ, уомул балыктары туттардылар, ону далбар хотуттар ыраастаан, кырбастаан, кичэллээхтик вакуумҥа суулаатылар, Абый улууһун балыга диэн суруктаатылар. 50-тан тахса киилэ араас балыгы соҕотуопка оҥорон бэлэмнээтилэр.
Саллааттарга көмөттөн кырачааннар да туора турбаттар. Уһуйаан уонна оскуола оҕолоро «Письмо солдату» бэлэмнээтилэр. Оттон хаһаайкалар «Теплая зима» акцияҕа кыттан, сылаас таҥас бэлэмнииллэр. Маны барытын түмэн, саҥа дьыллааҕы бэлэх гынан уолаттарга ыытыахтара.
Бу күннэргэ Уолбут нэһилиэгиттэн төрүттээх Ефимов Станислав Сергеевичка Абый улууһун землячествотын көҕүлээһининэн квадрокоптер ыларга көмөҕө Акция ыытыллар турар. Көмөҕө анаан нэһилиэккэ атыы-эргиэн дьаарбаҥката тэрилиннэ. Киирбит 32 000 солк. Дьокуускайга ыыттылар.
Дойдубут көмүскэлигэр туруммут биир дойдулаахтарбытыгар тиһигин быспакка көмөлһөн кыайыыны түргэтэтэбит.
Лариса Слепцова, Уолбут.