Улууспутугар, дьоҕус да буоллар, сайдыыбытыгар биллэр-көстөр кылааты киллэрэр Уолбут нэһилиэгин эдэр, уопутуран эрэр баһылык Эдуард Сергеев салайар. Кини кэпсииринэн, Киэҥ Күөлгэ билигин 144 киһи олорор. Нэһилиэк 22 ынахтаах, 238 сылгылаах, биир урбаанньыт, үс бааһынай-фермерскэй хаһаайыстыбалаах.
Урукку өттүгэр аатырбыт оттуур ходуһалардааҕынан, өҥ почвалаах хортуоппуй үүнэригэр анаммыттыы сирдээҕинэн ураты дойду. Холобур, 2021 сыллаахха 15,4 тонна хортуосканы ылан сөхтөрөн турар. Былырыын 292 тонна оту соҕотуопкалаан, кэнники үс-түөрт сылга ылыллыбатах кирбиини куоһарбыта.
Дьон туһугар үлэ
Нэһилиэк дьаһалтата үлэтин нэһилиэнньэ үлэлээх-дьарыктаах, онтон сиэттэрэн хамнастаах буоларын туһугар туһаайар эбит. Ол курдук, олохтоох бюджеттан быйыл 7 кулуну атыыласпыт, дьон сайаапкатынан 10 тонна фураж, комбикорм уонна туус аҕалыллыбыт, хаһаайыстыбаларга 7 сибиинньэ, 53 куурусса. Кууруссалара билигин сымыыттыыллар, оттон сибиинньэ күһүн идэһэҕэ туттуллар. Тыа хаһаайыстыбатын тэрилтэлэригэр сүөһүнү, техниканы, оттуур тэриллэри атыылаһарга уонна булчуттарга уматык, булт тэрилин аҕалыыга эмиэ үп көрүллэр. Холобур, 16 тоннаттан тахса таараламмыт АИ-92 бензини аҕалан, атыыга түҥэппиттэр, МТЗ-82 трактор саппаас чааһыгар 600 тыһ солкуобай, 7 кулуну атыылаһарга 300 тыһ. солкуобай бэриллибит. Урбаанньыт А.А. Черноградскайга көмө быһыытынан; нэһилиэккэ наадалаах ДПК инвентарын, малын-салын буларга; «Уолбут нэһилиэгэ» диэн фото-кинигэ тахсыытыгар; күһүҥҥү кэмҥэ Логистическай киинтэн вертолетунан 2500 киилэ, кыһынын массыынанан 900 киилэ бородуукта аҕалыытыгар балачча үп көрүллэн туһаныллыбыт. Итини сэргэ муниципальнай программа чэрчитинэн уһаайбалары тупсарыыга тутуу матырыйаалынан көмө оҥоһуллубут. СВО байыастырын дьиэ кэргэттэригэр 25-тии тыһ солкуобайдаах көмө, мастарын бэлэмнээһиҥҥэ уонна мууһунан хааччыйыыга анаан бензин бэриллибит. Онон, ааспыт сылга кулуну атыылаһарга барыта 210 тыһ солкуобайдаах, тыа хаһаайыстыбатын инвентарыгар 133 тыһ солкуобайдаах субсидия бэриллибит. Ааҕан-суоттаан көрдөххө — сүүнэ үлэ, баһаам харчы. Скороспелканы аҕалыыга уонна кини аһалыгын атыылаһарга 915 тыһ солк ороскуоттаммыт. Ити гынан, харчы-үп син бэйэтин сыанатын толуйан, дьон олоҕо туруктаах диэххэ наада.
Олох-дьаһах тупсарын туһугар
Киэҥ Күөл дьиэлэрэ-уоттара сылаас, тупсаҕай буоларын туһугар балачча үлэ ыытыллар. Икки сыллааҕыта 2 мөл 480 тыһ солкуобайдаах киин ититэр ситимҥэ холбонор турбалар атыылаһыллыбыттара. Ити анал бырайыак чэрчитинэн этэ. Онуоха өссө нэһилиэнньэ 60 тыһ, солк, урбаанньыттар 20 тыһ солк, олохтоох бюджет 400 тыһ солкуобайынан кыттыспыттарын бэлиэтиэххэ наада. Онон үөһэ этиллибит сыаллларга олохтоох бюджеттан 1 мөл 418 тыһ 500 солкуобай ороскуоттаммыт. Билигин 200 устуука турба тиэйиллэн сороҕо кэллэ. Былырыын СВО икки кыттыылааҕын дьиэлэрэ киин ититэр ситимҥэ холбоммуттара, оттон быйыл — «Сэргэ» маҕаһыын. Субуотунньук күүһүнэн учаастактааҕы балыыһа икки палаатата, оскуола эмиэ ититэр ситимҥэ холбонон тураллар.
Нэһилиэккэ өрөмүөн утумнаахтык, ситимин быспакка барар. Кулууп сцената, дьаһалта дьиэтин ис өттө саҥардылыннылар.
Манна олох саҥа сонун хаамыыларыттан да хаалсыы суох. Гидропневматическай оборудованиенан тэрилтэлэр батареяларын сууйуу ыытылынна, С-28 «Сирена» диэн уот туруутун биллэрэр тэриллэр, ПЛК-01 диэн ханаалы хаһар техника Леспромресурстан 160 тыһ солкуобайга атыылаһылынна, 10 киһилээх баһаарынай хамаанда тэрилиннэ. Бөх тоҕор 16 баахтар баар буоллулар.
Соруктар
Быйылгы соруктар сүрүннээн барылланан бүтэ иликтэр да, алта чааһынай дьиэ киин котельнайга холбоноро көрүллүбүт. Сүөһүнү иитиини бары өттүнэн өйөөһүн; кыра уонна орто урбааҥҥа болҕомтону күүһүрдүү, өйөбүл миэрэлэрин туттуу; бөһүөлэги тупсарыыга олохтоохтор көҕүлээһиннэринэн анал программаларга кыттыы — Уолбут нэһилэгин дьаһалтатын мүччүрүйбэт ытык иэһэ. Онтон да атын үлэ элбэх. Ситиһиилэри баҕарыаҕын.
Николай ПЕТРОВ.