Россия армиятыгар сааскы хомуур муус устар ый 1 күнүттэн саҕаламмыта. Россия үрдүнэн 150 тыһыынча киһини армияҕа ыҥырыахтаахтар — 18-30 саастаах дьону.
Абый улууһуттан ыам ыйын 29 күнүгэр түөрт призывнигы улуус дьаһалтатын дьиэтигэр, баһылык кабинетыгар, сахалыы сиэри-туому тутуһан, кымыһынан, алаадьынан айах тутан, атаарыы буолла. Улуус баһылыга Владимир Новиков уолаттарга туйгуннук сулууспалыылларыгар кэс тылын тиэртэ, билиҥҥи ыарахан кэмҥэ толкуйдаан, ырыҥалаан бэрээдэктээхтик сылдьарга, ытык иэстэрин чиэстээхтик толорон абыйдар ааттарын түһэн биэрбэт гына сулууспалыылларыгар ыҥырда. Кини армияҕа саҥа барааччыларга барыларыгар харысхал быһыытынан Эһэккэ Константин Чирков хаартыскаларын туттарда.
Призывник Александр Степанов ийэтэ Валентина Степанова бүгүн иккис уолун армияҕа атаарар, бастакыта сулууспалаан номнуо кэлбитэ. Кини оҕотун, СВО буойуна таайын курдук, чулуу саллаат буолуо диэн эрэнэрин эттэ. Саха дьоно туйгун саллааттар буолалларын бэлиэтээтэ уонна ыраах ыыппакаллар, Уһук Илиҥҥэ сулууспалыыллара буоллар диэн баҕа санаатын тириэртэ.
Ити курдук, биһиги уолаттарбыт армияҕа биир сыл сулууспалыы бараары, аэропорка киирдилэр.