Ураһалаах нэһилиэгэр үгэс быһыытынан «Баай барыылаах Байанай» күрэҕэ өрө күүрүүлээхтик, тыҥааһыннаахтык, киһи сүргэтэ көтөҕүллэр тэтимнээхтик ыытылынна.
Тэрээһин Аркадий Егоров-Тускун алгыс тылынан арылынна. Бу күнү кэрэ куоластаах Аида Антонова, Николай Максимов, Дария Алексеева уонна Сутуруоха эдэр ыччатын ырыалара киэргэттилэр.
Дьиэ кэргэн сылыгар аналлаах «Байанай-2024» күрэххэ Ураһалаах нэһилиэгин элбэх оҕолоох Слепцовтар дьиэ кэргэнин ийэлэрэ Александра, аҕалара Алексей уонна кинилэр кыра уоллара Дима, нэһилиэк биир киэҥ туттар Мария, улахан уоллара Александр бэһис оҕолоро Миша Стручковтар, тарбахха баттанар интернациональнай Ашырахмановтар дьиэ кэргэн күндү ийэлэрэ Мария уоллара Мичил уонна көхтөөх эдэр ыччат Егор Павлов, Бүтэй Бүлүүттэн силистээх эдэр элбэх оҕолоох Максимовтар дьиэ кэргэн ийэтэ Анна, ырыа аргыстаах Николай уонна ылсан-бэрсэн олорор чугастааҕы ыаллар улахан тутаах уоллара Максим Сорокоумов кытыын ыыллылар.
Күрэхтэһиини нэһилиэк киэн туттар дьоно, спортсменнара Иван Слепцов, Иван Стручков, Егор Садовников, Владимир Щелканов, Галина Шкулева, Туйаара Садовникова уонна Екатерина Дохунаева дьүүллээтилэр.
Күрэх бириэмэҕэ сааны ыһыыга-хомуйууга, ойбон алларыытыгар, араас күчүмэҕэйдэри туоруур сорудахтардаах эстафетаҕа (хайыһарынан сүүрүү, хаар устун сыыллыы, саанан ытыы, мас хайытыы, салаасканан соһуу), бириэмэҕэ уот оттон чэй оргутууга, ийэлэргэ, оҕолорго, аҕаларга туспа хомуур хапсаҕайга уонна бүтэҺик бүтүн дьиэ кэргэнинэн Буранынан сорудахтардаах эргииргэ түһүмэхтэнэн ыытылынна.
Дьиэ кэргэн күрэҕин түмүгүнэн I миэстэни Стручковтар ыллылар, олохтоох дьаһалта уонна сынньалаҥ киин аатыттан сыаналаах улахан телевизорынан наҕараадаланнылар. II миэстэҕэ Слепцовтар тиксэн, аныгы пылесоһу ыллылар, III миэстэҕэ Ашырахмановтар уонна Егор Павлов таҕыстылар, электрогрили туттулар. Төрдүс мэстэлээх Максимовтар дьиэ кэргэттэригэр утуйар мешок, гелевай коврик уонна булт сэлиэччигин туттардылар.
Дьиэ кэргэн күрэҕин таһынан «За личное первенство» диэн көрөччүлэртэн баҕалаахтарга 4 араас күрэх ыытылынна. Ол курдук, Александр Стручков хапсаҕайга I миэстэни ылан, үрүллэр матрааһынан наҕараадаланна. Маны таһынан Саша үҥүүнү быраҕыыга саамай ыраах кыыратан эмиэ I миэстэни ылан, газовай плитканан наҕараадаланна. Үһүс көрүҥҥэ хаардаах куулу сүгэн саамай сымсатын көрдөрөн бастаабыт Степан Щелканов спасательнай жилети ылла. Бүтэһигэр кыргытттарга «Хаардаах куулу соһуу» буолла. Саамай түргэнник сүүрэн кэлэн Анисия Андреева термобоулу тардан ылла, бастаата.
Атыы-эргиэн күрэҕэр саамай элбэх астаах Ураһалаах балыыһатын көхтөөх коллектива «Лучшая лавка» анал ааты уонна 5000 солкубайга «Север» маҕаһыыҥҥа сертификат ылла.
Салгыы «Уйгулаах-айхаллаах ат бөҕөстөрө» күрэх буолла. Кимиэхэ да иннилэрин биэрбэккэ дьулуһан, тимир көлөлөрүнэн биир күргүөмүнэн төлө көтөн айанныыллара көрөргө сөҕүмэр, дьикти, хатыламмат турук.
Уһун бураннарга – кыттааччылары ыраах быраҕан, уһулуччу чаҕылхайдык Егор Павлов бастаата Кылгас бураннарга инники күөҥҥэ түһэн бастакы Виктор Белоус кэллэ. Быйылгы Байанай күрэҕин уратытынан Аан дойдуга биллэр Олоҥхо уобарастарыттан күтүр күүстээх-уохтаах, мүччүргэннээх сырыылаах «Дьырыбына Дьырылыатта Кыыс бухатыырга» тэҥнээх билиҥҥи үйэҕэ Бухатыырдары сабырыйар, модун кыахтаах аныгы кэм Кэрэ Куоларын Буранынан күөн көрсүһүүлэрэ буолла. Бу саамай тыҥааҺыннаах күөн көрсүһүүгэ араас көлөҕө барытыгар айанныы үөрэхтээх Туйаара Садовникова бастакы кэлэн, үөрүү өрөгөйүн оройуттан тутта. Буран күрэҕин кыайыылаахтара хас биирдиилэрэ 150 лиитирэ бензини буор босхо ылан, үөрүүлэрэ үгүс.
Түгэнинэн туһанан, Ураһалаах сынньалаҥ киинин аатыттан биһиги убаастыыр күндү киһибитигэр Иван Слепцовка күүс-көмө, өйөбүл, эрэллээх тирэх буолбутугар, махтанабыт.
«Баай барыылаах Байанай» тэрээһин кыттыбыт дьиэ кэргэттэргэ умнуллубат өйдөбүнньүк түгэннэри хаалларда, сомоҕоолоото уонна Дьолу түстээтэ.
Мария Садовникова, Ураһалаах нэһилиэгин сынньалаҥ киинин салайааччыта,
Галина Белоус, киин уус-уран салайааччыта.