МАЙЫАР. Бу туһунан олохтоох тыа хаһаайыстыбатын исписэлииһэ Алексей Аргунов иһитиннэрэр. Тохсунньу 3 күнүнээҕи туругунан нэһилиэккэ 31 ынах сүөһү (ыанара 16), 143 сылгы (103-һэ биэ) тутан олороллор. Бу сылга 12 убаһаны иитиигэ хаалларбыттар. Ону таһынан 11 ыал 107 кууруссаны, 3 бөтүүгү иитэллэр.
– Саҥа дьыл иннинэ биир ынах төрөөбүтэ. Сылгы кыстыга, күһүн инчэҕэй хаардаах тоҥорон, ыарахан соҕустук ааһар. Сылгылаахтар сотору-сотору сылгыларын күрүөҕэ киллэрэн аһаталлар. Ону кытта тыатааҕы биэлэри уонна кулунчуктары тардан моһуоктаабыта.
Бу күннэргэ кыһыҥҥы суолунан сүөһү, сылгы эбии аһылыга кэллэ. 1,94 тн. комбикорм, 1,88 тн. эбиэс, 100 киилэ туус уонна кууруссаларга диэн 1,56 тн. комбикорм. Нэһилиэнньэ эрдэ сайаапка түһэрэр уонна атыылаһар сыанатын төлүүр. Тиэллэн кэлэр ороскуотун олохтоох дьаһалта уйунар. Үһүс сылын «Агрокульутара» диэн комбикорм оптовай атыытынан дьарыктанар тэрилтэттэн ылабыт. Хаачыстыбата үчүгэй.
Быйыл сайын 182 тн от оттоммуппут уонна кур оттоохпут. Христофор Жирков (бааһынай хаһаайыстыба) оту таһар. От тиэйиитин ороскуотун 50% олохтоох дьаһалта уйунар. Сайын элбэх сүөһүлээх Сидор Сидоровка 10 тн. уонна Андрей Захаровка 10 тн. оту кээһэргэ дьаһалта мобильнай биригээдэ туруорсан көмөлөспүтэ. Онон көмө баһаам.
Кууруссабытын нэһилиэнньэҕэ Олег Черемкин тиэйэн аҕалбыта. Майыар нэһилиэгин сүөһү иитээччилэрэ, түргэнник ситэр дьиэ кыылларын тутар хаһаайыстыбалара улуус дьаһалтатыгар, тыа хаһаайыстыбатын управлениетыгар улахан махталларын тиэрдэллэр, — диэн Алексей Аргунов кэпсээнин түмүктээтэ.
Сусанна Никитина