Сайын ортото ааста. Улууска тыа хаһаайыстыбатын чэрчитинэн уруккуттан олоҕурбут үлэлэр ыытылла тураллар.
Абый улууһун тыатын хаһаайыстыбатын салаата биллэрэринэн, от ыйын 19 күнүнээҕи туругунан ынах сүөһүбүт ахсаана — 616, ол иһигэр ыанар ынаҕа — 208. Улууска 1454 сылгы көрүллэн-харайыллан турар. Онтон 660-на — биэ.
Нэһилиэктэринэн анаарар буоллахха маннык. Абыйга 383 ынах, 754 сылгы бааллар. Манна күн бүгүн 97 ньирэй, 167 кулунчук төрөөн төлөһүйүүгэ тураллар. Майыарга ынах ахсаана 53, 174 сылгы баар, ону сэргэ 14 ньирэй, 42 кулун төрөөтүлэр. Муҥурдаах нэһилиэгэр 137 ынах сүөһү, 24 ньирэй, 203 сылгы, 31 кулун баалларын, Уолбукка 32 ынах, 266 сылгы, 13 ньирэй, 53 кулунчук көрүүгэ туралларын, Ураһалаах 11 ынах сүөһүлээҕин, 1 ньирэйдээҕин, 57 сылгылааҕын уонна 16 кулуннааҕын тыа хаһаайыстыбатын салаата бигэргэтэр.
Ити гынан, былырыыҥҥы көрдөрүүттэн ынах сүөһү ахсаана 41 төбөнөн аҕыйаабыта, ол оннугар сылгы 146 төбөнөн элбээбитэ бэлиэтэнэр. Сүөү ахсаана аҕыйааһына ынах сүөһү кырдьыытынан быһаарыллар диэн тыа хаһаайыстыбатын салаата өйдөтөр.
Улууска 825 дьиэ табата тутуллан тураллар, ол иһигэр 315 тыһы табалаахпыт. Итинтэн 800 таба, ол иһигэр 300 тыһы, 200 тугут Абый нэһилиэгэр бааллар. Оттон Майыарга таба ахсаана — 25, онтон 15-һэ тыһы таба диэн субуоккаҕа этиллэр.
Улахан сүөһүнү сэргэ улууспутугар 296 куурусса, 28 сибиинньэ көрүүгэ-харайыыга тураллар. Ол курдук, Абый нэһилиэгэ 109 кууруссалаах, 5 сибиинньэлээх. Майыардар 35 кууруссаны, 7 сибиинньэни иитэллэр. Муҥурдаахха 67 куурусса, 6 сибиинньэ баар. Уолбуттар 35 кууруссалаахтар уонна 7 сибиинньэлээхтэр. Ураһалаах нэһилиэгэр 50 куурусса, 3 сибиинньэ баарын субуокка кэрэһэлиир.
От үлэтэ
Улууска от ыйыттан от үлэтин хампаанньата саҕаламмыта. Бары нэһилиэктэри, чааһынай тэрилтэлэри хабан туран, былаан быһыытынан 1764 тонна от бэлэмнэниэхтээх.
Бу күннэргэ Абый нэһилиэгэр 401 гаалаах ходуһа охсулунна, 296 тонна от кэбиһилиннэ. Муҥурдаахха 51 га сир охсуллан, 27 тонна от бэлэмнэннэ. Майыарга 30 гаа сир охсулунна, онтон 26 тонна от ылыллынна. Уолбуттар 10 гаа сиргэ оттоотулар. Онон улууска билиҥҥи туруганан 349 тонна от кэбиһилиннэ. От үлэтигэр 54 тыраахтар, 85 звено (ол иһигэр 15 механизированнай, 32 механизированнай аҥаардаах, 9 ат көлө-илии звенота уонна 29 илиинэн эрэ үлэлиир звенолар), барыта 231 киһи от үлэтигэр кыттар диэн тыа хаһаайыстыбатын салаата биллэрэр.
(Абый улууһун тыатын хаһаайыстыбатын салаатын субуоккатыттан).
Николай Петров