Анастасия Сорокоумова төрөппүттэрин Александра Семеновна, Гаврил Николаевич Ребровтар сырдык ааттарын үйэтитэр «Күн сырдыгыныы күндү дьоммут» кинигэтэ Муҥурдаахха сүрэхтэннэ.
Кинигэ биһирэмигэр оҕолоро, сиэннэрэ, бииргэ үлэлээбит, алтыспыт доҕотторо, ыаллыы олорбут чугас дьонноро сырыттылар. Элбэҕи, умнуллубат түгэннэри аҕыннылар, истиҥ санааларын эттилэр. Бу бэлиэ түгэнинэн Дьокуускай куораттан, Хатастан, Абый нэһилиэгиттэн аймахтара Ребровтар видео сибээһинэн эҕэрдэлээтилэр. Ылбаҕай ырыа, кинигэҕэ киирбит хоһооннору ааҕыы биэчэри өссө дириҥ ис хоһоонноото. Ону таһынан көрөөччүлэргэ анаан «Дьоллоох сыыппаралар» оонньоннулар. Ыалдьыттар Александра Семеновнаҕа сыһыаннаах сыыппаралары таайан, тефаль чайникка тиийэ бириистэри тутан үөрдүлэр-көттүлэр. Ийэлэрэ киирбит ыалдьыкка ботуччу кэмпиэти туттаран ыытарын өйдөтөрдүү, оҕолор кэлбит ыалдьыттарын эмиэ оннук күндүлээтилэр. Кинигэ биһирэмэ олус сэргэхтик ааста.
Кинигэни Анастасия Гаврильевна 2017 с. суруйан саҕалаабыт. 2023 с. «Көмүөл» издательствоҕа оҥоһуллан 70 ахсаанынан мелованнай кумааҕыга бэчээттэммит.
Кинигэ оҥоһуута ураты. Ол курдук биир өттүттэн арыйдахха – Александра Семеновна туһунан, нөҥүө өттүттэн арыйдахха – Гаврил Николаевич туһунан. Кинигэ иһигэр аймахтар төрөөбүт күннэрин халандаара киирбитэ олус наадалаах эбит. Ийэлэрин, аҕаларын өттүттэн уруу-аймах древолара баар. Кинигэ QR-кодтаах. Кинигэҕэ киирбэтэх хаартыска презентацияларын, аҕалара бэйэтэ илиитинэн суруйбут Усть-Нераҕа сылгы үүрүүтүгэр сылдьыбытын туһунан ахтыытын уо.д.а. киирэн эбии ааҕыахха сөп. Кинигэ Белай Гора, Абый уонна Муҥурдаах библиотекаларыгар, Дьокуускайга национальнай библиотекаҕа, олохтоох оскуола музейыгар баар.
Александра Семеновна, Гаврил Николаевич сэттэ оҕону төрөтөн, иитэн-үөрэтэн таһаарбыттара, элбэх сиэн, хос сиэн удьуордарын салгыыр.
«Бэчээттэммит үйэлэргэ историяҕа хаалар» диэн этии оруннаах. Нэһилиэк киэн туттар, холобур оҥостор дьонун — Муҥурдаах нэһилиэгин Бочуоттаах олохтоохторун Александра Семеновна, Гаврил Николаевич сыралаах үлэлэрин-хамнастарын, дьоҥҥо-сэргэҕэ оҥорбут үтүөлэрин туһунан ахтыы кинигэ үйэ саас тухары көлүөнэттэн көлүөнэҕэ үтүө өйдөбүнньүк буолар.
Сусанна Никитина.