Сочи куоракка «У самого Черного моря» норуоттар икки ардыларынааҕы куонкурус-фестивалга Саха сирин делегацията үрдүк ситиһиилээхтик кытынна.
Бу туһунан Майыар нэһилиэгин оҕолорун култуура кэрэ эйгэтигэр кынаттаабыт, сылын аайы үрдүк ситиһиилэрдээх салайааччы Альбина Соломова маннык кэпсиир:
—»У самого Черного моря» норуоттар икки ардыларынааҕы куонкурус-фестивалга 135 нүөмэр толорулунна. Абхазия, Черкесия, Казань, Москва, Урал, Питер уонна Тюмень куораттартан кытыннылар.
Биһиги оҕолорбут ис дууһаларыттан кыһаллан, нүөмэрдэрин толоруулара үрдүктүк сыаналанна. Түмүккэ нэһилиэк, Абый сирин дьонун алгыһынан ситиһии кынаттаннылар. Кэрэчээнэ Захарова «Дьүкээбил» диэн Надежда Макарова ырыатынан Гран-При үрдүк аатын сүктэ.
«Осикат» ансаамыл Абый улууһун бастакы мелодиһа, ырыа айааччы, хоһоонньут, саха национальнай музыкальнай инструменнарын оҥорор маастар, хомусчут, былыргы саха ырыаларын толорооччу, артыыс, үҥкүүһүт Прокопий Егорович Слепцов-Ойуун Борокуопай айымньытыттан «Ат туһунан ырыаны» ыллаан, I истиэпэннээх лауреат аатын ылла.
Прокопий Егорович Саха сирин култууратын сайдыытыгар элбэх сыратын уурбут, дьон-сэргэ дууһатыгар үгүс кэрэни иҥэрбит ытык киһибит буолар. Бу толоруубут биир дойдулаахпыт быйыл 105 сылыгар ананар.
Николь Слепцова «Энкэчэму исули» эбээннии ырыанан II истиэпэннээх лауреат буолла. Кэрэчээнэ Захарова ийэтэ Мария Васильевна улахан дьоҥҥо «Сайын» ырыанан I истиэпэннээх лауреат үрдүк аатын ылла.
Түмүккэ, Санкт- Петербурга ыытыллар Грантовай куонкуруска ыҥырыы тутан үөрүүбүт үксээтэ.
Иккис бөлөх Аллайыаха улууһуттан Оленегорскайтан «Илик» ансаамбыл эбээн култууратын ситиһиилээхтик көрдөрдө. Композиция, ырыа, үҥкүү, муода номинацияларыгар лауреат аатын ыллылар. Ансаамбыл салайааччыта Татьяна Лебедева буолар. «Иликтэр» Кремлевскай елкаҕа ыҥырыы туттулар.
Саха сириттэн делегацияны бэрэстэбиитэл Лариса Макарова салайыытынан оҕолор Сочи куорат интэриэһинэй сирдэрин көрө-истэ, дуоһуйа сынньана сылдьаллар.
Хоту улуустан оҕолору Сочига, куонкуруска кыттыыта куруук буолар көстүү буолбатах. Бу барыыбытыгар көмөлөспүт дьоннорбутугар төрөппүттэрбитигэр, салайааччыларга уонна биһиэхэ ыалдьыбыт, эҕэрдэлэрин ыыппыт дьоҥҥо махтал тылларын этэбит.
Маннык улахан тэрээһиҥҥэ оҕо сайдар, үүнэр, атын оҕолору көрөн, сырдыкка, үтүөҕэ дьулуһар. Бу барыыбыт, ситиһиибит Майыар оҕолорун олохторугар биир сырдык өйдөбүл буолан хаалыа.
Александра ЗАРОВНЯЕВА.