Кулун тутар 4 күнүгэр Саха Республикатыгар норуот маастарын күнүн, Россияҕа Дьиэ кэргэн, республикаҕа Оҕо саас сылларын чэрчитинэн ыытыллыбыт XIV республикатааҕы “Якутия мастеровая” быыстапкаҕа улууспут уран тарбахтаахтара кытыннылар.
Быыстапка-дьаарбаҥкаҕа айар талааннаах, дьоҕурдаах дьоммут — норуот маастардара Татьяна Макарова (сиэлтэн панно), Василий Спиридонов (мас ууһа), «Айылгы» түмсүү (кыбытык тигии), иистэнньэҥнэр Вера Слепцова (төрүт иис), Клара Черемкина (сыаҥаан тириититтэн тигии, түү таҥас), Изольда Атласова, Майыар нэһилиэгиттэн Альбина Шкулева (төрүт иис), Муҥурдаахтан Маргарита Реброва (сиэлтэн өрүү), Дьокуускайтан Мария Никулина (оҕуруонан киэргэтиллибит таҥастар) бастыҥ үлэлэрэ турдулар.
Быыстапканы кытта быйыл Дьиэ кэргэн уонна Оҕо сылларынан сибээстээн «Удьуор Уус ситимэ» уус-уран оҥоһукка дьиэ кэргэн династияларын куонкуруһа буолан ааста. Куонкурус Арассыыйатааҕы «Вера. Надежда. Любовь» диэн национальнай култуураны, төрүт үгэһи норуот уус-уран оҥоһуктарыгар киллэрэн үйэтитэр, талааннаах дьиэ кэргэннэри чиэстиир тэрээһин чэрчитинэн ыытылынна. Манна Альбина Шкулева, Мария Никулина кытыннылар. Кинилэри Вера Слепцова, улуус баһылыга Владимир Новиков, Изольда Атласова өйөөтүлэр. Уопсайа 10 ыал кытынна. Муома улууһун Улахан Чыыстай нэһилиэгин Степан Слепцов аатынан «Мэҥэн ҥал» аҕа ууһун общината бастыҥынан ааттанна. Иккис миэстэ — Бүлүү улууһуттан Степановтар дьиэ кэргэн, үһүс миэстэ — Нам улууһун Хатырыгыттан Васильевтар дьиэ кэргэн буоллулар.
Норуот маастарын күнүн чэрчитинэн үгэс курдук сылын аайы ыытыллар төрүт омук таҥастаах сэлэлээн хаамыыга талба талааннаахтар сэлэлии хаамтылар. Үөрүүлээх тэрээһиҥҥэ улуус баһылыга, култуура үлэһиттэрэ, бастыҥ маастардарбыт, иистэнньэҥнэрбит кытыннылар.
Өбүгэ ытык үгэстэрин салҕыыр талааннаах дьоммут үлэлэрэ үксүү, сыаналана турдуннар. Билиилэринэн, дьоҕурдарынан дьоҥҥо-сэргэҕэ үтүө холобур буолан үөрэтэн-такайан, сүбэлээн-амалаан улууска маастардар элбии турдуннар.
Сусанна Никитина.