Оҕо быраастарын мобильнай биригээдэтэ алтынньы 10 күнүттэн саҕалаан улуус ыраах сытар нэһилиэктэрин оҕолорун барыларын көрдө: Абый, Муҥурдаах, Уолбут, Майыар. Бэҕэһээ быраастар Сутуруохаҕа үлэлээтилэр.
Оҕолор туруктарын 11 араас исписэлиис көрөр-истэр. Ол курдук манна невролог, лор, эндокринолог, хирург быраастар кырачааннар доруобуйаларын чинчийэллэр. Тутатына узига түһэрэн, ачыкы ырысыаба суруйан, анаалыс ылан, кардиограммаҕа, холтерга түһэрэн толору көрүүнү оҥороллор.
Мобильнай биригээдэ салайааччыта, педиатр быраас Вера Босикова: «Икки нэдиэлэ устата улуус бары нэһилиэктэрин хаптыбыт. Уопсайа 339 оҕону көрдүбүт. Мантан 78 оҕо саҥа булуллубут ыарыылаахтар. Бу оҕолор учуокка ылылыннылар. Сорохторго Дьокуускайга чинчийэн көрүүгэ барарга направление бэрилиннэ».
Мобильнай быраастар быйыл исписэлиистэрин, хайысхаларын элбэппиттэр. Ордук наадыйыллар тиис бырааһа бу сырыыга кэлэн, олохтоохтор үөрүүлэрэ үгүс.
Бу бырайыак көдьүүстээҕин олохтоохтор үөрэ бэлиэтииллэр.
Элбэх оҕолоох төрөппүт Мария Садовникова, Сутуруоха сэл.:
— Маннык элбэх специалистаах, оборудованиелаах быраастар биригээдэлэрэ киинтэн ыраах сытар улуустарга кэлэн оҕолору көрбүттэрэ олус үчүгэй. Биһиэхэ специалистар да тиийбэттэр, итинник оборудованиеларга да көрбөттөр. Куоракка элбэх оҕону илдьэр, көрдөрөр өссө ыарахан. Онон олус наадалаах бырайыак диибит уонна салгыы үлэлииригэр баҕарабыт. Ил Дархан Айсен Николаевка, быраастарга махтанабыт.
Алена Корякина, 5 оҕолоох ийэ, Сыаҥааннаах сэл.:
— Оҕолорбун барылаырн көрдөрдүм. Туруктара үчүгэй. Төрөппүттэр бары наһаа астынныбыт. Быраастар наһаа элэккэйдэр. Оҕолору кытта олус үчүгэйдик кэпсэтэллэр. Хаайтарбыт күннэригэр оҕолору, төрөппүттэри, учууталлары кытта тус-туспа көрсүһүүлэри тэрийэн, элбэх сүбэни-аманы биэрдилэр. Онон быраастарга улахан махтал. Бырайыак тохтооботугар баҕарабыт. Инники да өттүгэр маннык кэлэн оҕолорбутун араас специалист быраастар көрөр буоллахтарына, оҕолорбут доруобуйаларын туһугар эрэллээхпит.
Санатан эттэххэ, Ил Дархан Айсен Николаев сорудаҕынан арктическай улуустарга оҕолор доруобуйаларын бэрэбиэркэлииргэ анал мобильнай биригээдэлэр үлэлииллэр. «Мобильнай быраастар» бырайыак олоххо киириэҕиттэн, уопсайа 21 тыһыынчаттан тахса киһи доруобуйатын көрбүттэр, итинтэн 7 тыһыынчата оҕолор. Барыта 89 Арктика сэлиэнньэтэ хабыллыбыт.
Сусанна Никитина.