Өрөспүүбүлүкэтээҕи «Сыл кылаас салайааччыта» куонкуруска Майыар орто оскуолатын физикаҕа уонна информатикаҕа учуутала, VII кылаас салайааччыта Лия Егоровна Слепцова оскуолатын, нэһилиэгин, улууһун чиэһин көмүскээн, кытынна. Кини улуустааҕы күрэс кыайыылааҕа. Быйылгы куонкурус РФ уопсай үөрэхтээһинин Бочуоттаах үлэһитэ, СР үөрэҕин министерствотын үөрэхтээһин ситимин Бочуоттаах бэтэрээнэ Маргарита Константиновна Петрова кэриэһигэр ананна. Куонкуруска улуустартан, куораттан 26 бастыҥ кылаас салайааччылара күрэхтэстилэр.
— «Быйылгы куонкурус биир уратытынан күрэх кэмигэр кылаас салайааччыларыгар аналлаах куурус ыытыллыбыта буолла. Үөрэҕи анаан ыҥырыллыбыт педагогическай наука кандидата Дергунов Владимир Александрович ыытта. Наһаа үчүгэй куурус, бары сөбүлээтибит, — диэн Лия Егоровна кэпсиир. — Күрэс 3 күн буолла. Араас улуустартан, куораттан бастыҥ кылаас салайааччылара үс түһүмэҕинэн күрэхтэстибит. I түһүмэххэ бэйэни билиһиннэрдибит, II – «Дьоһуннааҕы кэпсэтии» кылаас чааһын ыыттыбыт, маастар-кылаас көрдөрдүбүт, III — «Кылаас салайааччытыгар ыйытык» пресс-кэмпириэнсийэ тэрилиннэ. Ити күн түмүк таҕыста уонна наҕаарадалааһын буолла. Кууруска 4 күн устата дьарыктанныбыт.
Бу 4 күн бары бэйэ-бэйэҕэ көмөлөсүһэн олус үчүгэйдик, биир күн курдук, ааста. Күрэх миэхэ олус туһалаах буолла. Элбэҕи биллим, көрдүм, астынным. Олус үчүгэй тэрээһиҥҥэ кытынным.
Түгэнинэн туһанан улууһум хаһыатын нөҥүө оскуолам коллективыгар, үөрэх управлениетыгар, кылааһым оҕолоругар, кинилэр төрөппүттэригэр, манна куоракка күүс-көмө, өйөбүл буолбут коллегаларбар Марина Дмитриевнаҕа, Василиса Семеновнаҕа улахан махталбын тиэрдэбин».
Маннык таһымнаах куонкуруска кыттыы учуутал олоҕор улахан суолталаах. Саҥа импульс, профессиональнай үөрэхтээһин суолларын муҥура суох көрдөөһүн. Бэйэтэ профессиональнай мастарыскыай буоллаҕа. Оттон кылаас салайааччытын уратыта диэн учуутал быһыытынан хаачыстыбата эрэ буолбакка, ийэлии кыһамньыта, хас биирдии оҕо ис эйгэтин туһугар ис дууһатыттан ыалдьара, үлэлэһэрэ.
Сусанна Никитина.