Үүммүт 2025 сыл дойдубутугар улахан суолталаах сыл буолар. Өрөгөйдөөх Улуу Кыайыы 80 сылын бэлиэтиибит. Онон туһаайан дойдубут Аҕа баһылыга Владимир Владимирович Путин уонна өрөспүүбүлүкэбит Ил Дархана Айсен Сергеевич Николаев биир санаанан бу сылы Дойдуну көмүскээччилэр сылларынан биллэрдилэр.
История көрдөрөрүнэн, Россия норуота сайдыы араас эриирдээх-эндэрдээх суолларыгар түмсүүлээх, сомоҕолоһуулаах буолан кыайыылаах тахсара. Оттон түмсүү, сомоҕолоһуу саҕаланар — иитииттэн. Бу санаабын Анал байыаннай дьайыы кыттыылааҕа, Уолбут нэһилиэгин олохтооҕо Егор Слепцов бигэргэтэр.
— Егор Аркадьевич, Анал байыаннай дьайыыга хаһан, ханна сылдьыбыккыный?
— Мин бастакы хомуурга бэбиэскэ тутан сэриигэ барбытым. Уссурийскайга анал үөрэҕи ааһан баран Мариуполь, Угледар, Ялта, Гуляй Поле хайысхаларга пехотнай чааска стрелогунан сылдьыбытым. 2023 сыл кулун тутарга демобилизацияланан дойдубар төннүбүтүм.
— Бу сыл Аҕа дойдуну көмүскээччи сылынан биллэрилиннэ. Эн санааҕар Аҕа дойдуну көмүскээччи хайдах буолуохтааҕый?
— Мин билигин санаатахпына, биһиги наһаа сөптөөх иитиини ылбыт эбиппит. Оскуола эрдэхтэн, кыра кылаастан пионерияҕа, комсомолга, коллективка сөптөөх идеаллары иҥэрэн улаатыннарбыттар
. Онтон улаатан армияҕа сылдьан, дойдуҥ иннигэр биэрэр андаҕар тылыҥ кыра сылдьан ылбыт иитиигин дириҥ суолталыыр эбит. Дойдуну көмүскээччи эппит тылыгар булгуччу турар, эппитин толорор биир тыллаах, булгуруйбат кытаанах санаалаах буолуохтаах.
— Ол аата Аҕа дойдуну көмүскээһин сөптөөх сыаннастары иҥэрииттэн саҕаланар буоллаҕа?
— Мин тус санаабар оннук. Оҕо кыра сааһыттан сөптөөх сыаннастары (простые истины) билэ, үрүҥү-хараны, үчүгэйи-куһаҕаны араара үөрэниэхтээх. Оҕоҕо сааһыттан көрөн иитии ис хоһооно, суолтата да уларыйан, дириҥээн иһиэхтээх дии саныыбын. Сөптөөх айымньылары ааҕан, киинэлэри көрөн улаатыахтаах.
— Эн Анал байыаннай дьайыыга сылдьан баран, киһи ханнык хаачыстыбатын ордук бэлиэтиигин?
— Биһигини кыра эрдэхпититтэн хайдахтаах да ыарахаҥҥа түбэстэргин, доҕоргун быраҕыма диэн үөрэппиттэрэ. Байыаннай балаһыанньаҕа доҕордуу сыһыантан, бэйэ бэйэни өйөөһүнтэн тыыннаах хааларыҥ быһаарыллар. Хайдах да ыарахаҥҥа доҕоргун көмүскүүр, өйүүр, «доҕорум туһугар» диэн санаа баһыйар.
— Эн бу тус сылтан тугу күүтэҕин?
— Анал байыаннай дьайыыга элбэх саха эр дьоно, эдэр оҕолор сэрии толоонугар оҕуннулар. Сэрии бүтэ охсоругар баҕарабын уонна Россия, Саха сирин правительстволара, бары тустаах органнар сэрииттэн эмсэҕэлээн кэлбит буойуттарга уонна сэриигэ суох буолбут уолаттар дьиэ кэргэттэригэр, оҕолоругар сөптөөх көмөнү кэмигэр оҥороллоругар, өйүүллэригэр баҕарабын.
Манна даҕатан эттэххэ, хомойуох иһин, Егор Аркадьевич сэрииттэн кэлбитэ иккис сыла буолан эрэр да, тоҕо эрэ удостоверениетын оҥотторуута кыалла илик. Онон тустаах органнар болҕомтоҕо ылан, сөптөөх көмө оҥоһуллуо диэн эрэнэбит. Түмүктээн эттэххэ, бу сыл устата Аҕа дойду сэриитин кыттыылаахтарыгар, сэрии огдооболоругар, сэрии тулаайахтарыгар социальнай өттүнэн, доруобуйа харыстабылыгар элбэх көмө оҥоһуллуо диэн күүтэбит. Маны таһынан билигин буола турар Анал байыаннай дьайыы кыттыылаахтарыгар, кинилэр дьиэ кэргэттэригэр сиппэтэх-хоппотох боппуруостарыгар уонна күннээҕи олохторугар туһалаах саҥа дьаһаллар баар буолуохтара диэн эрэнэбит.
Лариса СЛЕПЦОВА.