Анна Ивановна Кривошапкина Абый улууһун олохтоохторугар биллэр киһи. Кини нэһилиэнньэ биир наадыйар — докумуоннары толотторор, булларар нотариус идэлээх буолан, манна күүтүүлээх специалист. Бу күннэргэ кини Амма нотариальнай уокуругуттан улууспут дьаһалтатын сайаапкатынан оройуоҥҥа кэлэн үлэлээн барда.
Абый улууһугар нотариус суох буолан, Анна Ивановна биһиги улууспутугар сыһыарыллыбыта төрдүс сыла. Дьаһалта дьиэтигэр түбүктээх үлэтин быыһыгар көрсөн кэпсэтиигэ, «оннооҕор Ленскэйтэн Дьокуускайынан эһиги улуускутугар кэлэр түгэн эмиэ баара» диэн күлэр. Ону ханна олорон, аһаан сыльаҕын диэн ыйыппыкка, гостиницаҕа түһэбин, онно аһаталлар, дьон кыһалҕатын учуоттаан күнү-дьылы аахсыбакка, киэһэ хойукка диэри, сороҕор түүҥҥэ дылы үлэлиибин диир.
Ити командировкатыгар биир субуоталаах баскыһыанньаҕа Кэбэргэнэҕэ массыынанан сахсыллан тиийэн, элбэх киһи докумуонун бигэргэппитин, хата үөрэ-көтө кэпсээтэ. Сааһыран эрэр дьахтар киһи диэтэххэ, айаны тулуйар эбит. «Ээ, үөрэммитим ыраатта, дьон докумуоннарын булан сааһылаан биэрэрим миэхэ үлэбиттэн астыныы чувствотын үөскэтэр. Биир да киһи, миэхэ суруйтаран баран кураанах төннүбэтин туһугар, тустаах тэрилтэлэртэн ыйытык оҥорторобун, хоруйдарын кэтэһэбин, онуоха интернет мөлтөҕө бытаардар. Кэнники сылларга, ордук 2023 сыл бүтүүтэ, аварийнай дьиэлэр хаһаайыннара улуус дьаһалтатын кытта дьиэлэрин дьаһалта бас билиитигэр биэриигэ Сөбүлэһиилэрин оҥорорго күүстээх (түүннэри да олорор кэм баара) үлэ ыытылынна. Ол барыта дьон, сыл бүтэ илигинэ харчыларын ыллыннар диэн, кыһаллан үлэлээһин буолар. Ханна да сырыттарбын дьон махтала сүрдээх улахан. Ол — мин үлэм сыанабыла, мин толорбут үлэбиттэн дуоһуйуум», — диэн мичээрдиир.
Кырдьык түбүктээх үлэ быһыылаах, хата Анна Ивановна билэрэ, уопуттааҕа араас балаһыанньаттан тахсарга дьоҕурдааҕа көмөлөһөр. Кини икки үрдүк үөрэхтээх, информационнай технолог уонна юрист идэлээх, онон бүгүҥҥү күҥҥэ туох саҥаны сокуоннарга киллэрбиттэрин, нотариат боппуруостарын үчүгэйдик билэрэ үлэтигэр көмөлөөх. Нотариус эбээһинэһэ сүрдээх улахан, киэҥ. Араас дэбиэринэстэри, атыы-эргиэн дуогабарын, төрөөбүт сылы, кэргэннии буолууну, арахсыыны, өлүүнү бигэргэтии, нэһилиэстибэни анааһын, онтон аккаастаныы, итэҕэйии дуогабардарын оҥоруу, докумуоннары булуу — бу барыта Анна Ивановна үлэтэ эбит. Биһиэхэ нотариус суоҕа олус куһаҕан диэбиккэ, ис санаата үчүгэйин, «сотору бэйэҕит нотариустаныаххыт, стажировката бүттэр эрэ кэлиэ», — диэн эппититтэн да сабаҕалыахха сөп.
Николай ПЕТРОВ.