Кини Күөх Ньурба кыыһа — Сыаҥааннаах балыыһатын терапевт бырааһа Галина Федотова. Көрдөрүнэ сылдьан, хата таарыччы, эбиэт кэмигэр быыс булбутугар, кабинетыгар бэрт кылгастык кэпсэттибит.
2021 сыллаахха Иркутскайдааҕы медицинскэй университеты бүтэрэн баран, Галя Абый улууһугар «Земскэй быраас» программанан Сыаҥааннаах балыыһатыгар учаастактааҕы бырааһынан ананан кэлбит. Ити программанан бэриллэр балачча сүүнэ харчыны Дьокуускайга дьиэ ыларга ипотекаҕа туттубутун ахтан ааспыта бу кыыс аһаҕаһын, дьону кытта үтүө сыһыаннааҕын туоһулуур диэри гынабын. Сорохтор итинник буолбаттар, харыстанар, көҥөнөр курдук тутталлара баар суол. Ол иһин маннык — атын сыһыаннаах ыччат, олоххо саҥа көрүүлээх дьон элбээн иһэрэ үөрдэр.
«Белай Гораҕа кэллэххинэ, Сыаҥааннааҕыҥ бырааһа суох хааларын туох дии саныыгын?» — диэбиккэ, — «Улуус киин балыыһатыгар терапевт уһун кэмҥэ суоҕунан, миигин манна командировкалыыллар. Киин балыыһа үлэтин, онтон сылтаан нэһилиэктэр балыыһаларын үлэлэрин хаачыстыбатын доруобуйа харыстабылын министерствотыгар көрдөрүөххэ наада. Ол иһин миигин терапевт быһыытынан ыҥыран ыланнар, эмтээһин боппуруостарыгар отчуот курдугу оҥортороллор», — диэн быһаарда. Бэйэтин туһугар эмиэ дьикти инструкция баар эбит…
«Абыйга үлэлии, олоро кэлбит киһи маннааҕы дьон-сэргэ хайдаҕын син биллэҕиҥ буолуо?» — диэн үтэн-анньан көрбүппэр, кыыһым: «Мин бу үс сыл иһигэр Абый улууһугар хаан баттааһынын кытта сибээстээх ыарыылар, сахарнай диабет, бүөр ырыыта үгүһүн биллим. Миэхэ ити ыарыылартан эмтэнэ кэлээччи элбэх. Омуктар аһыыр астара, тымныы айылҕа дьайыыта, хамсаныы суоҕа ити ыарыылары көбүтэр. Ол иһин, көрүнэн аһыахха, хамсаныахха наада, наар эминэн үлүһүйэр эмиэ соччото суох. Бүөр ыарыыта кыра улууска элбэҕэ дьиктиргэтэр, таҥна сылдьыбаттан буолара чуолкай», — диэн үлэтин өрө тутан кэпсээн барда. Онтон эрэ дьэ: «Абый улууһун дьонун сөбүлээтим, киһини намтаппат, ыраас дууһалаах дьон эбит. Сыаҥааннаахха дьүөгэбин медсестраны, эмиэ Ньурба кыыһынаан бииргэ олоробут. Дьон көмөлөһөр, эти, балыгы аҕалан биэрэллэр. Ону истэннэр Ньурбаҕа олорор төрөппүттэрбит наһаа үөрэллэр, махтаналлар. Ону баара сатаан тириэрдибэттэр. Хата улууспут хаһыатын нөҥүө дьоммут махталларын тириэрдэбит. Биһиги иллэҥ кэммитигэр хаһыаппытын ааҕабыт. Улуус сонуннарын билэр бэрт бөҕө. Миигин Белайга сотору-сотору барар дииллэрин эмиэ ааҕабын. Онно кыыһырбаппын, дьон кыһалҕаттан итинник саҥаралларын билэбин. Төһө сатыырбынан, билэрбинэн нэһилиэнньэҕэ көмөлөһө сатыыбын, көмөлөһүөм даҕаны, эмтиэм даҕаны», — диэн эбиэт бүтэн, Галина пациеннарын көрө, приемнуу сестратын кытта бэлэмнэнэн бардылар. Манна диэн эттэххэ, Галина Валериевна Абый улууһугар уһуур санаалаах быһыылаах диэн тылын тамаҕыттан иһиттим. Оннук эрэ буоллун.
Николай ПЕТРОВ.