«Устар ууну сомоҕолуур уус тыллаах киһи» дэтэр дьон сахаларга былыргыттан бааллар, уос номоҕо буолан симэлийэн хаалбаттар. Айдарыыбыт ити өрүтүн таба тайанан, бу күннэргэ «Аман өс» күрэҕэ Абый улууһун оҕолорун ортотугар буолан ааста. Дьиктитэ диэн (мин санаабар буолуо) эбии нууччалыы тылынан ыытыллыбыта сонун курдук. Онон «Сахалыы саҥа сатараатын» эрэ диэн буолбакка, «Звучи, родной язык мой» диэх курдук икки тылынан барбыта кэрэхсэбиллээх. Саха оҕолоро икки тылынан саҥара үөрэнэллэрэ, тугу саныылларын, толкуйдуулларын этэн-тыынан тириэрдэллэрэ бэрт бөҕө буоллаҕа дии. Санаатын сатаан аһаҕастык эппэт киһи төһө да киэҥ билиилээҕин иһин, муҥкук-тэҥкик буолааччы, ситиһиэҕин ситиспэтин олох көрдөрөр.
Күрэххэ хара бастакыттан кыттар баҕалаах элбэҕэ сөхтөрдө. Барыта 24 оҕону иһиттибит. Бу — оҕо уһуйааннарыгар, үөрэх кыһаларыгар төрөөбүт уонна нуучча тыллара үөрэтиллэрэ, ирдэнэрин түмүгэ диэх курдук. Оҕолор эрдэ бэлэмнэммиттэринэн: төрөөбүт тыл, төрүччү, дьиэ кэргэн суолтатын, ааҕыы, дьол, дойду туһунан өйдөбүллэри сайыннаран тыл эттилэр, уопсай билиини туругутар ыйытыыларга хоруйдаатылар.
Бэйэм көрөөччү быһыытынан уһуйаан оҕолоругар Милана Никулина, Слепцов Айсан, начаалынай кыластарга Халыева Аня, Никулина Сайнаара, ортолорго Ефимов Дима, Новгородов Айтал, Скрыбыкин-Александров Аслан, улахаттарга Старкова Нарина толорууларын дуоһуйа иһиттим. Ити мин кимиэхэ да соҥнооботох, дьүүлгэ дьайбатах сыанам буолар. «Хотугу кыым» редакциятын аатыттан Ураһалаах орто оскуолатын үөрэнээччитигэр Стручков Ромаҕа сахалыы дакылаатын иһин анал Диплому туттардыбыт.
Бу түһүлгэҕэ оноолоох соннооох, көмүс ойуулаах курдаах, халадаай чараас ырбаахылаах, илин кэбиһэрдээх, бастыҥа баайыылаах, кэтэспит курдук элбэҕэ суох буолан биэрдэ. Ол өйдөнөр — оҕолор буоллахтара дии. Ити гынан баран, хас да оҕо сахалыы сайбарыччы таҥанан киирэллэрэ ураты тыыны биэрэрин көрөөччү сыаналаата диэххэ наада. Ону тэҥэ Сутуруохаттан оҕоҕо сөптөөх сырдык өҥнөөх сайыҥҥы ырбаахылаах кыргыттар имигэс бэйэлээхтик хамсанан ыллыыры-туойары, чабырҕахтыыры, оонньууру үтүктэн көрдөрөн, «Аман өс» күрэҕин арыйбыттара, кыттыылаахтары эҕэрдэлээбиттэрэ өйбөр хатанан хаалбыт.
Тус бэйэм «Дархан этээччи» диэн бастыҥ аат баара буоллар, Старкова Наринаҕа биэриэ эбиппин. «Аман өһү» салгыы сайыннарыахха диэтэххэ, улахан, сиэрин-туомун тутуһан ыытылларын тула бары өттүнэн интэриэстээх кэпсэтии ыытыллара эрэйиллэр кэмэ кэлбит.
Мантан аллараа күрэх кыайыылаахтарын кытта билсиҥ.
«Аман өс» күрэх кыайыылаахтара
Уһуйаан иитиллээччилэрэ
I миэстэ— Никулина Милана, «Тугутчаан» (Кэбэргэнэ), II миэстэ — Корякина Аделина, «Кэнчээри», (Сыаҥаннаах), III миэстэ — Коннов Марк, «Кораблик», (Белай Гора)
Начаалынай кылаастар
I миэстэ— Халыева Аня, Муҥурдаах орто оскуолата, 3 кылаас, II миэстэ —Новикова Валя, Абый орто оскуолата, 3 кылаас, 3 миэстэ — Слепцова Николь, Майыар орто оскуолата, 1 кылаас.
Орто сүһүөх кылаастар
I миэстэ— Новгородов Айтал, Уолбут орто оскуолата, 8 кылаас, II миэстэ — Скрыбыкин-Александров Аслан, БГ гимназията, 6 кылаас, 3 миэстэ — Ефимов Дима, Муҥурдаах орто оскуолата, 5 кылаас
Үдрүкү кылаастар
I миэстэ—Старкова Нарина, Белай Гора гимназията, 9 кылаас, II миэстэ — Никулина Анжелика, Абый орто оскуолата, 10 кылаас, 3 миэстэ —Садовников Вадим, Уолбут орто оскуолата, 10 кылаас.
Маны таһынан, бөлөхтөрүнэн «Эҥкилэ суох сахалыы, нуучалыы саҥарыы иһин» диэн номинациялар иҥэрилиннилэр. Онно Милана Никулина, Аня Халыева, Нарина Старкова икки номинацияҕа иккиэннэнигэр бастаатылар. Айтал Новгородов сахалыы тылынан саҥарыыга, Аслан Скрыбыкин нуучча тылынан саҥарыыга инники күөҥҥэ таҕыстылар.
Николай ПЕТРОВ, дьүүллүүр сүбэ кыттыылааҕа.