Бу кэлбит сыл Россияҕа Дьиэ кэргэн сылынан, оттон өрөспүүбүлүкэбитигэр Оҕо сылынан биллэрилиннэ. Онон барыбытын улахан үлэ күүтэр. Олохтоохтортон 2024 сылга тугу баҕарыаххыт этэй уонна туох уларыйыыны кэтэһэҕит диэн ыйыталастыбыт.
Евгения Неустроева, элбэх оҕолоох ыал ийэтэ:
— Дойду Президенэ Владимир Путин Россияҕа «Дьиэ кэргэн сылын» биллэрбитин үөрэ истибиппит. Дьиэ кэргэҥҥэ көмө баар, туһанабыт, махтанабыт.
Оҕону сахалыы тыыҥҥа иитиигэ өссө болҕомто ууруллуон, саха тыллаах, сиэри-майгыны, өбүгэлэр үгэстэрин сыаналыыр, тутуһар, билэр дьиэ кэргэн элбиэн баҕарабын. Уһуйааҥҥа, оскуолаҕа сахалыы эйгэ баар буолуохтаах дии саныыбын. Биһиги дьиэ кэргэн сахалыы иитиилээх буолан маны тутуһабыт, итэҕэйэбит.
Былаастан бу сылга уларыйыыны күүтэбит бөҕө буоллаҕа. Биһиги Арктическай оройуоҥҥа олорор буоламмыт, оҕолорбут сайдыылара син биир хаалан иһэр. Киин куоракка, улуустарга араас куонкурустарга, күрэхтэргэ кытта баралларыгар бырайыас олус ыарахан. Оҕо сайдарыгар күрэхтэргэ кыттара наһаа туһалаах.
Дьиэ кэргэнинэн сынньана, күүлэйдии, оҕолорбутугар атын сири-дойдуну, култуураны көрдөрүөхпүтүн субсидированнай билиэт ахсаана олус аҕыйах. Атыыга таҕыстар эрэ 5 мүнүүтэ иһигэр бүтэр. Элбэх оҕолоох ыал бюджетыгар бу олус охсуулаах.
Ирина Васильевна ЧЕРЕМКИНА, Белай Гора олохтооҕо:
— Дьиэ кэргэн сыла диэн олус наадалаах. Итиниэхэ уонна Оҕо саас сылыгар анааннар 50-70 сылы бииргэ кэргэннии буолан олорбут оҕонньордоох эмээхсиҥҥэ ханнык эмэ чэпчэтии көрүллэригэр уонна элбэх оҕону төрөтөн, иитэн, билигин сиэннэри көрсөр дьону боччумнаахтык бэлиэтиэхтэрэ этэ диэн ыра санаалаахпын. Онуоха олохтоох былаас кыаҕа уонна баҕата наада.
Майя Кулышева, руководитель отделения социальной помощи семье и детям УСЗН:
— Ожидаю усиления профилактической работы с семьями с несовершеннолетними детьми, состоящими на учете, а также совершенствование информационной помощи семьям с ТЖС по оказанию государственной социальной помощи в виде социального контракта, В своей работе будем стремиться улучшить качество жизни семьи детей посредством педагогико-психологических методов. Планируем провести различные конкурсы, фотоконкурс, выставку национальной одежды. В этом направлении тесно работаем с библиотекой села Кэбэргэнэ, думаем, и другие наслега подключатся.
Елена Садовникова, В.Н.Дохунаев аатынан Муҥурдаах орто оскуолатын дириэктэрин сүбэһитэ:
— Нэһилиэкпит биир тыын кыһалҕатынан оскуолабыт, уһуйааммыт дьиэтэ-уота хаарбах, тымныы туруктаахтара буолар. Ол курдук, оскуолабыт олус эргэ. Оҕолор кыһыннары хас да дьиэнэн сүүрэ сылдьан үөрэнэллэр (мастарыскыай, түмэл, спортзал, остолобуой туспа тураллар). Оҕо сайдарыгар бары усулуобуйа тэриллэрэ буоллар. Онон төһө да оҕо ахсаана аҕыйаатар, киһи барыта саҥа оскуола тутулларын кэтэһэр. Оскуолаланнахпытына, киһи да ахсаана эбиллиэ, дьон да олохсуйуо этэ.
Ону таһынан, урукку курдук, оҕолорго сайын өрөспүүбүлүкэ таһыгар, иһигэр даҕаны босхо сынньаналларыгар кыах бэриллэрэ буоллар, наһаа үчүгэй буолуо этэ.
Үсүһүнэн, быйыл «Дети Азии» Дьокуускайга буолаары турар. Онно ыарахан бырайыастаах хоту олорор оҕолорбутун ыытан, көрөллөрүгэр кэрэ түгэни бэлэхтииллэрэ буоллар диэн баҕа санаалаахпын.