Самаан сайыммыт үтүө күннэрэ үүннүлэр. Бу кылгас кэрэ кэми оҕолор туһалаахтык атааралларын туһугар дойду устун араас лааҕырдар тэриллэн үлэлииллэр. Олор истэригэр сыллата Муҥурдаах орто оскуолатын базатыгар «Эйгэ» оҕо сынньалаҥ лааҕыра үлэлиир. Быйыл бу лааҕыры алын кылаас учуутала Алена Корякина уонна баһаатай Ксения Ефимова салайаллар. Оскуолаҕа тиийэн, лааҕыр кыттыылаахтарын кытта көрүстүм.
Елена Садовникова, «Уолан» үлэ лааҕыра:
— «Эйгэ» лааҕырга 25 оҕо сылдьар. Онон сайыҥҥы кэмҥэ манна хаалбыт оскуола оҕото 100% хабылынна. «Эйгэ» иһинэн үс лааҕыр баар. Олортон «Уолан» үлэ лааҕырын оскуолабыт бэйэтэ үптээн үлэлэтэр. Манна 5 оҕо диэн былааннаабыппыт, билигин 3 оҕо сылдьар. Быйыл 80-ча хаппыыстаны, 40-ча помидору, 50-ча оҕурсуну, 30-ча переһи, 10-ча кабачогу, ону таһынан хортуоппуйу, моркуобу, сүбүөкүлэни олортубут. Билигин сибэкки олордуута эрэ хаалла. Оскуола оҕолоро бары хортуоска олордуутугар, уу кутуутугар, сыыс ыраастааһыныгар, сибэкки буорун бэлэмнээһиҥҥэ көмөлөһөллөр.
Алена Корякина, лааҕыр салайааччыта:
— Бэс ыйын 5 күнүттэн от ыйын 1 күнүгэр диэри үлэлиибит. Улахан кылаас оҕолорун бөлөҕө «Сайдыы» диэн ааттаах, мин салайабын. Художественнай-эстетическэй, спортивнай хайысхалаах. Оттон кыра бөлөх «Непоседы» диэн, Ксения Ефимова салайар. Кинилэр оҕону сынньатар, сааратар хайысхалаах үлэлииллэр.
Оҕолор 11-тэн киэһэ 5 чааска диэри сылдьаллар. Сарсыарда сэрээккэ, онтон дьарыктар. Иккитэ аһыыллар: эбиэт уонна түөртүүр аһылык. Повардарынан Татьяна Левина, Агафья Слепцова үлэлииллэр.
Лааҕыр аһыллыытыгар «Көрдөөх эстафета» тэрийэн ыыппыппыт. «Баһаартан сэрэхтээх буолуу оскуолата» диэн былааны ылынан үлэлиибит. Ити тиэмэҕэ араас үлэ ыытыллыаҕа, ол иһигэр уруһуйдар, блогердар куонкурустарын тэрийэр былааннаахпыт. Түмүккэ, лааҕыр сабыллыытыгар, кэнсиэр туруоруохтаахпыт. Кыра бөлөҕү кытта уопсай тэрээһиннэрдээхпит. Бөһүөлэк ыраастааһыныгар субуотунньукка тахсыахтаахпыт. Нэһилиэк ыһыаҕар кыттыахтаахпыт. Лааҕыр сабыллыыта эмиэ уопсай. Быыһыгар-ардыгар оҕуруокка үлэ баар буоллаҕына, көмөлөһөбүт.
Истиэнэҕэ ыйыыр ыйынньыктарын оҥордулар, дьуһуурустуба, былааннарын суруйдулар. Россия күнүгэр уруһуй куонкуруһун ыыппыппыт. Бастакы миэстэни Настя Сергеева, иккис миэстэни – Максим Дохунаев, үһүс миэстэни – Мила Стручкова, Оля Шкулева ыллылар.
Салгыы спорт күнэ буолуохтаах. Теннискэ, дуобакка күрэхтэһиэхтэрэ.
Ити курдук үлэлээн эрэбит.
Ксения Ефимова, лааҕыр баһаатайа:
— Мин С.Ф. Гоголев аатынан Дьокуускайдааҕы педагогическай колледж 1 кууруһун бүтэрдим. Алын кылаас учуутала буоларга бэлэмнэнэбин.
«Баһаатай дьыалата» предмети үөрэтэбит, ол онон манна практикалана кэллим. Лааҕырга кэлэн, бастаан оҕолортон тугу баҕаралларын ыйыппытым. Онон Уол күнэ, Кыыс күнэ, Балаакка күнэ уо.д.а. ыытыахпыт диэн былааннаабыппыт. Ону таһынан 10 дьарык ыытыахтаахпын. Тиэмэм – ыһыах. Норуот тылынан уус-уран айымньыта (фольклор), саха үҥкүүтэ. Лааҕыр оҕолорун нэһилиэк ыһыаҕар кытыннарар баҕалаахпын.
Лааҕырга үлэлээн баран, күһүн үөрэхпэр тиийэн, практикабын көмүскүөхтээхпин.
Салгыы кыралартан лааҕырга сылдьар төһө үчүгэйий диэн ыйыппыппар, бары биир киһи курдук: «Үчүгэй! Наһаа үчүгэй!» — дии түстүлэр. Онтон биирдиилээн ыйыттым.
Аня Халыева:
— Манна наһаа бэһиэлэй. Бэйэҥ баҕараргынан сылдьаҕын. Араас интэриэһинэй тиэмэлээх күннэр буолаллар. Аспыт үчүгэй. Мороженай сиэбиппит. Оскуолаҕа үөрэнэ 8 чааска кэлээччибит, оттон манна 11–тэн кэлэбит (үөрэр).
Света Корякина:
— Оскуолаҕа үөрэнэрдээҕэр үчүгэй. Итии күҥҥэ бассейнныыбыт. Тугу баҕарар гыныахха сөп. Күн аайы саҥаттан саҥа, сонун күн. Аспыт үчүгэй. Сок иһэбит, «Альпен Гольд», «Аленка» сакалаат сиэбиппит.
Айтал Старостин:
— Лааҕырга, биллэн турар, интэриэһинэй. Аһыыбыт, уруок суох, элбэхтэ оонньуубут, спортзалга сылдьабыт, зарядкалыыбыт. Бэйэ-бэйэбитин өйүөххэ наада эбит диэн биллим.
Ити курдук кэпсэтэ олордохпутуна, үлэ лааҕырын салайааччыта Елена Садовникова киирэн, оҕолор бүгүн оҕуруокка ноһуом таспыттарыгар, кирээккэ отун ыраастаабыттарыгар махтанна. Оҕолор өссө да көмөлөһүөх буоллулар. Кинилэр лааҕыры сөбүлүүллэрэ сирэйдэриттэн-харахтарыттан тута көстөр. Бары үөрэ-көтө сылдьаллар. Оскуола оҕуруотчуттарыгар көмөлөһөн баран, сынньана таарыйа, ким эрэ кэпсэтэ-кэпсэтэ олорон уруһуйдуур, ким эрэ музей былыргы паартатыгар олорон, учуутал үөрэнээччи буола оонньуу сылдьар. Кинилэри көрөн, дьоллоох оҕо саас диэн бу буоллаҕа дии саныыгын.
Дьэ, ити курдук кэпсээннээх «Эйгэ» лааҕыр салайааччылара, оҕолоро хас биирдии күнү сонуннук, сэргэхтик көрсөллөр.
Анджела РЯЗАНСКАЯ.