(П.Н.Черемкин аатынан Абыйга дуобат күрэҕэ)
Абый нэһилиэгэр улуус биир күүстээх дуобатчыта, элбэх күрэхтэр кыайыылааҕа Петр Черемкин сырдык кэриэһигэр үгэс буолбут улуустааҕы дуобат күрэҕэ ахсыс төгүлүн ыытыллынна.
Дуобакка күрэхтэһии хара маҥнайгыттан бэрт сытыытык барда, састаап олус күүстээх. Улуус күүстээх дуобатчыттара күөн көрүстүлэр.
Тыҥааһыннаах киирсии түмүгэ маннык буолла:
Орто саастаах оҕолор:
I миэстэ — Дамир Слепцов (Белай Гора), II миэстэ — Кирилл Никулин (Абый), III миэстэ — Анита Томская (Абый).
Улахан саастаах оҕолор:
I миэстэ — Алена Слепцова (Кэбэргэнэ), II миэстэ — Алеша Черемкин (Абый), III миэстэ — Сулус Жирков (Кэбэргэнэ).
Эр дьон:
I миэстэ — Александр Корнилов (Абый), II миэстэ — Спартак Черемкин (Абый), III миэстэ — Владимир Филиппов (Белай Гора).
Дьахталлар:
I миэстэ — Ия Слепцова (Абый), II миэстэ — Диана Ушакова (Белай Гора), III миэстэ — Анастасия Афанасьева ( Абый).
Блиц-турнир:
Чемпион — Спартак Черемкин (Абый), II миэстэ — Владимир Филиппов (Белай Гора), III миэстэ — Иван Слепцов (Деску).
Кыайыылаахтар Петр Николаевич оҕолорун, аймахтара, Абый нэһилиэгин дьаһалтата туруорбут сыаналаах бириистэринэн, мэтээллэринэн, махтал суруктарынан наҕараадаланнылар
Александр Корнилов, табаарыһа, I разрядтаах дуобаччыт: «Петр Николаевич дуобакка күүстээх оонньооччу этэ. Абый нэһилиэгиттэн бастакынан I разряды кини ылбыта. Кэлин уола Спартак Черемкин, мин, Дмитрий Стручков, Алексей Слепцов ылбыппыт. Улууска буолар күрэхтэһиилэргэ бастакы, бириистээх миэстэлэргэ тиксэрбит. Дуобакка күрэхтэһии буолаары гыннаҕына, хамаанда тэринэн, массыына булан кыайыыга дьулуһан, үөрэ-көтө киирэрбит. Миигин дуобат эйгэтигэр угуйбут киһи — Петр Николаевич буолар. Дуобат хаамыыта диэн олох хаамыыта. Киһини толуйдуурга үөрэтэр, өй, кругозор сайдар. Кэлэр көлүөнэҕэ, кини ыччаттарыгар — уолугар Спартакка, сиэнигэр Лёняҕа дуобат оонньуутунан күүстээхтик дьарыктаналларыгар, сайдалларыгар баҕарабын. Сыл ахсын Абый нэһилигэр доҕорум аатынан дуобат күрэҕэ буолара хайҕаллаах дьыала».
Любовь Федорова, Петр Николаевич кыыһа: «Сылын ахсын аҕабыт кэриэһигэр ыытыллар улуустааҕы дуобат күрэҕэ бу да сырыыга бэрт сэргэхтик буолан ааста. Тоһуттар тымныыттан толлубакка кэлэн кыттыбыт, миэстэҕэ тиксибит спортсменнарга эҕэрдэбин тириэрдэбин. Сыл ахсын тэрийэн ыытар нэһилиэк дьаһалтатыгар, чуолаан баһылыкка Тимофей Томскайга биһиги аҕабыт сырдык кэриэһигэр улахан күрэхтэһиини өйдөөн, өйөөн тэрийэригэр барҕа махтал буоллун. Спонсордаспыт тэрилтэлэргэ, Абыйга, Дьокуускай куоракка олорор чугас аймахтарбар махтал. Барыгытыгар чэгиэн доруобуйаны, үөрүүнү, ситиһиини баҕарабын».
Анна Чиркова, Абый.