Бу ый 3 күнүгэр улуустааҕы депутаттар сэбиэттэрин аатыгар Ил Түмэн депутата В.Н. Фелоров официальнай суругу ыытта. Ол текстигэр «Оптимизация бырайыактарын өйдөөхтүк-төйдөөхтүк аччатыы уонна олоххо киллэрии» («Умное сжатие и реализация проектов по оптимизации») диэн оробуочай бөлөҕү тэрийэр туһунан суруллубут. Билиҥҥи кэмҥэ аҕыйах ахсааннаах нэһилиэнньэлээх пууннары сабыы, ол иһигэр Абый улууһунааҕы Дьооску учаастагын эмиэ сабар туһунан боппуруос күөрэйбит.
Маны улуус нэһилиэнньэтэ бүттүүнэ уонна депутаттар улуустааҕы сэбиэттэрэ утаралларын биллэрэллэр.
Дьооску ынах сүөһүнү уонна сылгыны тутар, иитэр бөдөҥ хаһаайыстыба быһыытынан биллибитэ ыраатта. Манна киэҥ мэччирэҥнэр, оттуур ходуһалар бааллар, инники кэскилигэр манна сүөһү аһылыгын саппаас фондатын олохтуур барыл баарын санатыах этибит. Оччоҕуна, ыарахан кэмнэригэр Муома, Үөһээ Дьааҥы, Орто Халыма улуустарын хаһаайыстыбалара ол фондаттан туһаныахтара этэ.
Оттон Дьооску учаастагын саптахтарына эбэтэр сарбыйдахтарына, сирин-уотун лаҥхаҕа кубулутуу, талахха былдьатыы суоһуур. Билигин баар өлгөм үүнүүлээх мэччирэҥнэри, ходуһалары чөлүгэр түһэрэр ыарахаттардаах буолуо дии саныыбыт. Ону таһынан олохтоох нэһилиэнньэни бэйэ ынаҕын үүтүнэн, этинэн хааччыйыы куһаҕаннык дьайыаҕа.
Бу күннэргэ тыа хаһаайыстыбатын министерствотын кытта саха ынаҕа генетиптээх сүөһүнү булунар, аҕалар туһунан кэпсэтии бара турар. Дьооску учаастага оройуон уонна республика экономиката сайдарын туһугар сылын аайы ынах сүөһү ахсаанын 50-тан 113-кэ диэри, сылгы ахссанын 15-тэн 70-ҥа диэри былааннаахтык улаатыннарар санаалаах…
Дьон санаата
Тимофей Томскай, Абый нэһилиэгин баһылыга: «Кулун тутар 5 күнүгэр Дьооскубут сабыллар туруктаах буолла диэн соһуччу сурах кэлэн, барыбыт өйбүтүн-төйбүтүн аймаата, улахан ыксалы үөскэттэ. Абый сиригэр былыр-былыргыттан дьон тоҕуоруһан, түмсэн олорбут сирдэрэ Дьооскубут буолар. Саха омук биһиги эргин кэлиэҕиттэн 400-чэ сыл ааста. Бу тухары Дьооскуга саха дьоно сылгы, ынах ииттэн, үлэлээн-хамсаан ньиргиччи олорон кэллибит. Аҕыйах ахсааннаах дьон олорбуттарын да иһин, тыа хаһаайыстыбатын өттүнэн көрдөрүүлэринэн Дьооску улууска өрүү инники көрдөрүүлэрдээх! Ынах сүөһүттэн ахсаанынан Абый кэнниттэн улууска иккис көрдөрүүлэрдээх, от оттооһунугар сыллата былааннарын толороннор инники кэккэҕэ сылдьаллар. Бу барыта манна үлэһит дьон олороллорун туоһулуур. Кэнники кэмнэргэ Дьооскуга ППМИ программатынан сотовай сибээс усилителя туруоруллубута, олус үчүгэй көрүҥнээх, тутуулаах оҕо оонньуур площадката тутуллубуттара, икки сыллааҕыта саҥа котельнай үлэҕэ киирбитэ, быйыл саҥа дизельнай электростанция үлэтин саҕалыахтаах этэ. Бу барыта инники үтүө кэскили түстүүр хамсаныылар. Инники өттүгэр, сөптөөх тирэх булуллан, Дьооскуга саха ынаҕын иитэр, от оттоон хотугу улуустары отунан хааччыйар база тэрийиитэ былааҥҥа баар.
Дьооску хаһаайыстыбаҕа эрэ инники көрдөрүүлээх буолбатах! Общественнай хамсааһыннарга эмиэ инники күөҥҥэ сылдьар. Ол курдук, культура өттүгэр талааннарынан киэн эйгэҕэ биллибит ырыаһыттар, уруһуйдьуттар манна олороллор, мантан төрүттээхтэр. Билигин буола турар Анал байыаннай дьайыыга Дьооскуттан 4 уол саа-саадах тутаннар өстөөҕү кыдыйсыыга кыттыбыттара, кытта сылдьаллар. Биир уолбут сэрии хонуутугар геройдуу охтубута.
Абый нэьилиэгин олохтоохторо, кыраттан кырдьаҕаһыгар диэри, бука бары төрүт сирбитин Дьооскубутун сабары утарабыт! Билиҥҥи кэмнэ Арктика сайдарыгар улахан болҕомто ууруллан турар кэмигэр.
Сахабыт сирин үөһээ былааһа биһигини өйдүөҕэ, өйүөҕэ диэн эрэнэбит!
Куйаар ситимиттэн
Бу боппуруос турбутугар Куйаар ситимигэр, нэһилиэктэргэ да аймалҕан таҕыста. Дьон санаатын тириэртэххэ маннык.
- Урут Николай Иванович Соломов баар эрдэҕинэ көмүскэһэр этэ. Өссө 90-с сылларга Михаил Ефимович Николаевтыын Федерация Сэбиэтин мунньахтарыгар Уһук Хотугу сирдэргэ дэриэбинэлэри сабыыны утарбыттара. Оттон кэнники Ил Түмэн бэрэсэдээтэлинэн талыллан үлэлииригэр Оттоох Атахха республика отун базатын тэрийэр туһугар киирсибитэ.
- Иван Иванович Слепцов улуус оскуолаларын, детсадтарын этинэн хааччыйан олорор улууска биир бөдөҥ хаһаайыстыбалаах үлэһит киһибит буолар. Быйыл кини үлэтин НВК каналга «Үлэ дьоно» биэриигэ сырдатан тураллар. Кини олорор сириттэн уларыйар түгэнигэр сүөһүтүн эһэргэ күһэллэр. Оччотугар бүтүн улуус үөрэҕин тэрилтэлэрэ олохтоох этинэн хааччыллыбат кутталга киирэбит. Оҕолорбут ыарахан сыаналаах, мөлтөх хаачыстыбалаах кэлии бурятский этинэн, кэнсиэрбэнэн аһыыр буолуохтара.
- Оттоох Атах республикаҕа биллибит талааннаах ыччаттардаах. Ил Дархан мэтириэтин уруһуйдуур конкурска Оттоох Атах ыччата Семен Слепцов кыайбыта, ол үлэни Айсен Сергеевич бэйэтинэн дьүүллээбитэ. Аны СВО-ҕа сылдьар даҕаны уолаттардаахтар. Инникитин хайдах буолар, оччоҕо…
- Туох да айылҕа өттүттэн алдьархайа суох (стихийное бедствие) буоллаҕына, аҥардас харчыны кэмчилиир сылтаан дьону төрөөбүт-үөскээбит, үлэлии олорор сирдэриттэн тэскилэтэр, мин санаабар, сыыһа, киһи быраабын күөмчүлүүр. Нэһилиэк сабыллыытын боппуруоһа үөһэттэн буолбакка, олохтоохтортон тахсыахтаах, государство онно көмөлөһүөхтээх.
- Итиччэ сүөһүнэн сайда, элбии турар учаастагы саппатыннар, дьон бэйэлэрин дьиэлэриттэн хайдах, ханна барыахтарай, олохторун тухары олорбут туппут дьиэлэрэ буоллаҕа. Гран ылан үлэ бөҕө ыытылынна. Дьооскуну саппаттарын туһугар куоласпын биэрдим.
Уважаемые жители Абыйского улуса!
По итогам сбора подписей собрано 1326 подписи. От имени Улусного совета депутатов выражаем слова благодарности населению и главам поселений за солидарность, оперативность и поддержку общей петиции против закрытия участка Деску.
Надеемся, что вышестоящие органы власти услышат и поддержат жителей района. Благодаря сплоченности населения совместными усилиями за один день проведена большая работа. Оригинал документов успели отправить в Якутск на самолете.
Председатель Улусного совета Абыйского района Айталина Унарова.