Биллэн турар, сүөһүлээх-астаах киһи ханнык да кэмҥэ кыпчыттарбат, хоспоҕун аһа тутахсыйбат. Ол эрээри, аныгы үйэҕэ киһи барыта сүөһү-ас ииттэр-булунар кыаҕа суох. Маннык түгэҥҥэ тыа хаһаайыстыбатын түргэнник ситэр салаатынан дьарыктаныы абырыыр.
Сайыҥҥы кэмҥэ куурусса, сибиинньэ ииттэн ким эрэ харчыланар, ким эрэ идэһэҕэ туттан кыһыҥҥытыгар хаһаанар. Кэнники дьылларга, сыл ахсын, улуустааҕы тыа хаһаайыстыбатын салалтатын дьаһалынан (сал. Анисья Черемкина) нэһилиэктэргэ куурусса, сибиинньэ, коза аҕалан түҥэтэр буоллулар. Бу олус наадалаах, абыраллаах тэрээһин.
-
Добун Никулин: Мин 10 кууруссаны ылбытым. Билигин бары сымыыттыы тураллар. Бэйэбит сиэбиппит таһынан атыыланан харчы оҥостобун. Онон кууруссаларым сыаналарын саппытым ыраатта. Комбикорму эрдэ сакаастаммытым. Сордоҥунан хааһы буһаран эбэбин уонна күннээҕи тахсар астан сиэтэбин, күөх оту үргээн быраҕабын.
Кууруссаны хас да ыал кыһыннары эмиэ тутар. 7-8 ыал биһиги курдук атыыласпыттара. Онон урукку курдук 2 лоток сымыыты сакаастаан эрэйдэммэппит, күн ахсын остуолбутугар сибиэһэй сымыыт баар.
Кырдьаҕастарым да абыраннылар, мин да дьарык булунан утарынан харчы киллэринэ олордоҕум дии.
-
Василий Ребров: 3 сибиинньэлээхпин. Ылыам диэммин былааннанан былырыын күһүҥҥүттэн аргыый аҕай бэлэмнэммитим. Эргэ хотонум иһигэр-таһыгар күрүө-хаһаа, сарай туттан, турар миэстэлэрин тус-туспа оҥорбутум. Оһохпун, оттор маспын булунан кэбиспитим. Кыһыны быһа астарын мунньан подвалга бырахпытым, Дьэ ол кэнниттэн сибиинньэлэрбин саас аҕалбыттарыгар бэлэм, сылаас сиргэ “чып” гыннаран кэбистэхпит дии.
Бурдук боппуруоһа ыарахан соҕус. Дьиҥэ, комбикорм сакаастаан ыллаттарбытым да, онтум туормастанан хаалан, ситэри айаннаан кэлбэтэ. Аҕыйах куул бэйэбэр баар этэ. Онтубар эбии, билэр дьоммунуун, бурдугу бурдукка диэн атастаһан абыранным.
Уонна эбэбит барахсан, биир эмэ чорохой “дук” гыннаҕына, ону хааһылыыбын. Күҥҥэ иккитэ аһатабын. Сарсыарда 8 ч., киэһэ 6 ч. наар биир кэмҥэ аһатабын. Биирдэ эмэ кыргыттартан обрат ылан иһэрдэбин. Биир аһылыкка 30-ча киилэ хааһы сииллэр. Буочуканан оҥоһуллубут оһоххо сүрдээх түргэнник буһар. Маспын саас хайыттан, саһааннаан бэлэмнэммитим. Ол иһин, үлэтэ чэпчэки.
Аһым төһө тиийэринэн тута сатыам. Бэйэм суоттанарбынан сэтинньигэ эҥин дылы буолара буолуо. Сүөһүлэрдээх киһи буолан, киэһээттэн сарсыҥыбын былааннаммытынан турабын. Онон дьарык булан абыранным.
Туох барыта бэлэмнэнии үлэтиттэн саҕаланыахтаах. Баһылай курдук эрдэттэн былааннанан-оҥостон, бу күһүҥҥүттэн тэриниҥ уонна аны саас сибиинньэ, куурусса ылан ииттиҥ.
Анастасия СОРОКОУМОВА.