Кулун тутар саҕаланыыта «Общая воля — во благо» республика дьахталларын II съеһэ киэҥ программалаах ыытылынна. Съеһи Евгения Исаевна Михайлова салайааччылаах Саха сирин дьахталларын «Дьүөгэлэр» аһаҕас форумнара регионнааҕы уопсастыбаннай хамсааһын көҕүлээн ыытта. Түөрт күн устата киэҥ хабааннаах, олус туһалаах программалаах көрсүһүүлэргэ үгүс кэпсэтии, санаа атастаһыыта, уопуту тарҕатыы буолла.
Ол курдук, бастакы күн делегаттар СВФУ иһинэн үлэлиир дьахталлар политическай кулууптарын иһинэн дьахталлар, ийэлэр оҕону патриотическай иитиигэ оруолларын кэпсэттилэр. Семинары СВФУ историческай факультетын история, обществознание уонна политология кафедратын сэбиэдиссийэ Ольга Парфенова салайан ыытта, бэрт интэриэһинэйдик бу темаҕа кэпсээтэ. Тэрээһиҥҥэ Саха сиригэр Аҕа дойду буойуттарын дьиэ кэргэттэрин кэмитиэтин эрэгийиэннээҕи отделениетын салайааччыта, Владимир Путин Саха сиригэр итэҕэллээх киһитэ Марина Бахилина кытынна. Кини үс уола дойдуларын көмүскүү сылдьалларын, дьиэ кэргэннэригэр кинилэри хайдах ииппиттэрин, бэйэтэ хайдах байыаннай дьайыыга барбытын кэпсээтэ. ДНӨ Саха сирин тирэх пуунугар үлэтин, бу соторутааҕыта АГАТУ студеннара бэйэлэрэ бэлэмнээбит астарын илдьэ госпитальга байыаннай дьайыы кыттыылаахтарын кытта көрсүбүттэрин, байыаннай дьайыы кыттыылаахтарын дьиэ кэргэттэригэр араас хайысхалаах көмө оҥоһулларын сырдатта.
Нөҥүө күнүгэр «Здоровье семьи: традиции и современные подходы к оздоровлению» олус туһалаах семинар буолла. Ыал ийэтэ хаһаайка эрэ буолбакка, дьиэ кэргэн доруобуйатын менеджерэ хайысханан киэҥ кэпсэтии таҕыста.
Саамай эппиэтинэстээх күнүнэн үһүс күн буолла. Сарсыардаттан дьахталлар министиэристибэлэр, биэдэмэстибэлэр кыттыылаах «Үөрэҕирии», «Доруобуйа харыстабыла», «Демография», «Культура», «Экология» федеральнай национальнай бырайыактар Саха сирин хас биирдии улууһугар олоххо хайдах киллэриллэллэрин ырыттылар, кыһалҕалаах боппуруостарын үрдүкү салалтаттан ыйыттылар, туруорустулар. Абый делегациятыттан Светлана Черемкина улууска биир сытыытык турар доруобуйа харыстабылыгар каадыр тиийбэтин, чуолаан гинеколог быраас хаһыс да сылын суоҕун сырдатта. Бу боппуруоска министиэристибэ салгыы үлэлииригэр сурук бэлэмнииргэ эттилэр. Евгения Исаевна мунньаҕы ыытар истиилэ кэпсэтиини былаас өттүттэн отчуот эрэ буобакка, ханна кыаллыбат, ситэ быһаарыллыбатах, үлэҕэ киирбэтэх боппуруостары салайааччылары кытта бииргэ киэҥник ырытыыга туһаайда, нацбырайыактар үлэҕэ хайдах киирэллэрэ слайданан арылыччы көрдөрүлүннэ. Сийиэс кыттыылаахтарыгар сыыппара көрдөрүүтүнэн буолбакка, нэһилиэнньэ олоҕор дьайыытын истибиттэрэ, көрбүттэрэ ордук хамаҕатык киирдэ. Ыйытааччы, этинээччи олус элбэҕиттэн сороҕун оробуочай боппуруос быһыытынан быһаарарга этии киирдэ. Евгения Михайлова муниципальнай былаас быһаарыахтаах боппуруостарын атын таһымҥа быһаартара сатааһын оройуон таһымыгар үлэ ситэ ыытыллыбатыттан тахсарын тоһоҕолоон бэлиэтээтэ.
Күн иккис аҥарыгар «Общая воля — во благо» республика дьахталларын II съеһин пленарнай мунньаҕа ыытылынна. Үөрүүлээх чааска республика баһылыга Айсен Николаев, Ил Тумэн комитеттарын салайааччылара, министирдэр, солбуйааччылара, ведомстволар уонна общественнай тэрилтэлэр бэрэстэбиитэллэрэ кытыннылар. Мунньах саҕаланыытыгар государственнай наҕараадалар, анал ааттаах бириэмийэлэр туттарылыннылар уонна дьахталлар түмсүүлэригэр номинациялар лауреаттара ааттаннылар. Сийиэс республика бары муннуктарыттан айар-тутар, таһаарыылаахтык үлэлии-хамсыы сылдьар үөрэҕирии, култуура, доруобуйа харыстабылын, олохтоох бэйэни салайыныы тэриллиитин үлэһиттэрин, улуустар дьахталларын сэбиэттэрин чилиэннэрин, бэтэрээннэрин, «Россия ийэлэрэ» уопсастыбаннай тэрилтэ улуустардааҕы салаатын чилиэннэрин – барыта 400 дьахтары түмтэ.
Дьахталлар сомоҕолоспут күүстэрэ улахан күүс буоларын манна көрөҕүн. Дойдум, дьонум туһа диэн сүүрэр-көтөр, үлэлиир-хамныыр общественник дьахталлары көрөн киһи сүргэтэ көтөҕүллэр. «Төһөнөн элбэхпит, оччонон күүстээхпит!» диэнинэн салайтаран дьахталлар үлэлииллэр, олоххо дьайаллар.
Сийиэс түмүгүнэн дьахталлар Ыҥырыы ылыннылар. Ону тэҥэ бүтүн Россия дьахталларын форумугар делегаттары таллылар. Ол курдук, Саха сириттэн дойду дьахталларын форумугар биэс делегат кытынна: Дьокуускай куораттан «Союз женских организаций» салайааччытын солбуйааччыта Альбина Черепанова, «Көмүлүөк» фирма салайааччыта Ольга Григорьева, ХИФУ наука уонна инновация департаменын салайааччыта, филологическай наука кандидата Нинель Малышева, Амматтан улуустааҕы музыкальнай оскуола салайааччыта Любовь Заварзина уонна Үөһээ Бүлүүттэн Ороһутааҕы сынньалаҥ киинин салайааччыта Анна Иванова.
Сусанна Никитина.