Бүгүн, олунньу 19 күнүгэр, СӨ Бырабыыталыстыбатын 2024 сыллааҕы үлэтин отчуотун туруорар бөлөх Сыаҥааннаахха, Оттоох Атах учаастагар уонна Абыйга үлэлээтэ.
Сыаҥааннаах. Сарсыардаттан Сыаҥааннаах нэһилиэгэр В.Н.Дохунаев аатынан орто оскуолаҕа сырыттылар. Бу дьиэ улууска саамай бастакы тутуллубут оскуола дьиэтэ. Онон эргэрэн, нэһилиэнььэ саҥа оскуола тутуутун туруорсубута хаһыс да сыла. Аҥаардас үчүгэй көрүү-истии түмүгэр эрэ сэнэхтик турар. Ыалдьыттар коллективы, үөрэнээччилэри кытта кэпсэттилэр. Оскуоланы, музейы көрдүлэр.
Screenshot
Тыа хаһаайыстыбатын министерствотын сүөһү иитиитин салааларын сайыннарыы департаменын салайааччытын солбуйааччы Галина Николаевна Осипова Муҥурдаах нэһилиэгин ынах, сылгы иитиитинэн дьарыктанар урбаанньыт Старостиннар хаһаайыстыбаларыгар үлэни-хамнаһы билистэ.
Старостиннар 50 ынах сүөһүнү тутан олороллор, онтон 25-һэ ыанар. Саас 25 төрүөҕү күүтэллэр. Маны таһынан түргэнник ситэр дьиэ кыылы иитэллэр. Хотоҥҥо куурусса, коза туталлар. Инникитин коза иитиитин күүскэ ылсар былааннаахтар.
Тыа сирин дьонун тыа хаһаайыстыбатыгар саҥа сокуон киириитэ ордук долгутар. Тыа хаһаайыстыбатын управлениятын салайааччыта Анисья Черемкина миэстэтигэр көмөҕө тыа хаһаайыстыбатын министерствотыттан специалистар кэлэн үлэлиэхтээхтэрин эттэ.
СӨ ситэриилээх былааһын отчуотун сыаҥааннаахтар сэргээн иһиттилэр. Олохтоохтор Арктическай улууска тутуу материалын босхо аҕалыы программата быйылгыттан үлэтин саҕалыырын үөрэ иһиттилэр, махтаннылар.
Суол-иис, самолет сайыҥҥы көтүүтэ, оскуола тутуута, тыа хаһаайыстыбатыгар балбаах, кур от сокуона, өртөөһүн, Арктическай зоналарга граҥҥа киирсии, ЖКХ-ҕа сайыҥҥы ыйдарга тымныы кэмҥэ өйөбүлгэ хочуолунайы оттуу курдук боппуруостары көтөхтүлэр.
Оттоох Атах. Бырабыыталастыба отчуоттуур бөлөҕө салгыы Оттоох Атах учаастагар үлэлээтэ.
Тыа хаһаайыстыбатынан дьарыктанар учаастак олохтоохторо тыһыынчанан тонналаах оттуур сирбитин өртөөһүн бобуулаах буолан, сүтэрэн эрэбит диэн хараасталлар.
Аҕыйах сыллааҕыта хочуолунай дьиэтэ тутуллан, үлэҕэ киирбитин ытыс таһынан махтаннылар. Ааспыт сылтан ДЭС дьиэтин тутуута саҕаламмыт. Манан сылтаан эргэ ДЭС дьиэтин гараж оҥостуохтарын баҕаралларын биллэрдилэр. Бу этии боротокуолга киирдэ.
Олохтоохтор быраастар мобильнай биригээдэлэрэ улуустарынан сылдьан дьон доруобуйатын бэрэбиэркэлиирин үчүгэй эрээри, ыксалынан — 1,5 чаас эрэ көрөллөрүн эттилэр. Маныаха үлэлэһэллэригэр туруорустулар.
Абый. Салгыы бырабыыталыстыба члиэннэрэ Абый нэһилиэгэр үлэлээтилэр. Бырабыыталыстыба чилиэннэрин т.н.д. А.Е.Слепцов аатынан Абый орто оскуолатын үөрэнээччилэрэ үөрүүлээх быһыыга-майгыга көрүстүлэр. Сахалыы сиэринэ ыалдьыттары алаадьынан күндүлээтилэр. Республика бырабыыталыстыбатыгар сылаас, сырдык, саҥа оскуолаҕа үөрэнэллэрин иһин махталларын эттилэр.
Ыалдьыттар оскуоланы көрдүлэр, коллективы, үөрэнээччилэри кытта сэһэргэстилэр.
ГУП ЖКХ генеральнай директорын солбуйааччыта Лев Соров уонна Абый улууһун ОДьКХ начаалынньыга Гаврил Горохов Абый нэһилиэгин хочуолунайын үлэтин кытта билистилэр.
Үлэһиттэр атын нэһилиэк хочуолунайдарыттан үлэлиир обьеммут улахан эрээри, хамнаспыт биир дииллэр, чуолкайдаһаллар.
Сир ирэн, сыбаайа хамсаан, хочуолунай аварийнай турукка киирбитин бэлиэтээтилэр. Быйылгы былааҥҥа таас чох обьемун элбэтэри туруорустулар.
Салгыы нэһилиэнньэ иннигэр өрөспүүбүлүкэ ааспыт сылга үлэтин-хамнаһын билиһиннэрдилэр, санааларын иһиттилэр, туруорсуулары болҕомтоҕо ылан боротокуолга киллэрдилэр.
Хас нэһилиэк аайы бырабыыталыстыба чилиэннэрэ нэһилиэнньэни кытта тус көрсүһүүлэри тэрийдилэр.
Нэһилиэктэринэн отчуот, нэһилиэнньэ туруорсуутун туһунан сиһилии сырдатыахпыт.