Былырыын, Саха АССР төрүттэммитэ 100 сылыгар, Владимир Малашкин Орто Халыма Өлүөкэ күөллээҕи сылгы тутар собуотуттан Абый улууһугар 100 сылгыны аҕалан, ууһатар-элбэтэр сыаллаах Уолбуттарга Шкулева Сахая Юрьевна ИП-га туттарбыта. Урут манна сылгы үөрэ турбат буолан, адьырҕа буулаабат этэ. Оттон быйыл эһэлэр икки биэни тарпыттырын туһунан Абый улууһун Экология государственнай комитетын старшай инспектора Александр Иванович Новиков иһитиннэрдэ.
Кини этэринэн, хас да хонуктааҕыта кырдьаҕас, 9 саастаах эһэ, икки 2 уонна 3 саастаах эһэлэри батыһыннара сылдьан, сылгы үөрүн аймаабыттар. Онон сылгыһыттар бэрэстэбиитэллэрэ Владимир Малашкин, Григорий Черемкин, Андрей Луковцев буоланнар, ити тыатааҕылары дьаһайарга күһэллибиттэр. Дьиҥинэн, сылгылары манна аҕалыахтарыттан ыла, Уҥа Айахха 6 эһэни өлөрбүттэр эбит. «Онуоха адьырҕа кыыллар дьоҥҥо-сэргэҕэ, сылгыһыттарга, дьиэ кыылыгар-сүөлүгэр, сылгыларга кутталынан суоһуулларын аччатар, бэрээдэктиир сыаллаах көҥүлү ыла охсон, түргэнник бултаабыттарыгар, улахан хоромньу тахсыбатаҕар үөрүү. Ол көҥүл түргэн бэйэлээхтик от ыйын 11 күнүгэр кэлбитэ», — диир Александр Иванович.
Онтон тыа баһаарын туһунан ыйыталаһыыга кини билиҥҥи туругунан улахан умайыы суоҕун эттэ. Арай Кэбэргэнэ уонна Сыаҥааннаах икки ардыларыгар Дружина үөһэ Ырыбына учаастагар, суол-иис суох, ыркый тайҕаҕа биир баһаар баарын эттэ. Ол иннинэ Белай Гораттан 26 км аллараа, Натаалыйа таһыгар, Штильнай диэн учаастакка биир баһаар тура сылдьыбытын, ону умуллара 14 киһи 4 моторканан баран үлэлээбиттэрин эттэ. Кинилэргэ, өрөбүл күн күүстээх ардах түһэн, уот умулларыытыгар көмө буолбутун кэпсээтэ.
Түмүгэр, сир аһын хомуйуу саҕаланарынан тыаҕа уоту, кутааны оттубакка-умаппакка, табаах тобоҕун умулларан баран быраҕарга, ойуурга, күөл кытыытыгар сэрэхтээхтик сылдьарга улуус олохтоохторугар бэйэтин көрдөһүүтүн хаһыатынан тириэртэ.
Николай Петров.